ქართული ოცნების აღმასრულებელი მდივანი, ირაკლი კობახიძე ამბობს, რომ ნაციონალურ მოძრაობასთან და ევროპულ საქართველოსთან არჩევნების გადამოწმების საკითხზე ამდენი დროის დახარჯვა შეცდომა იყო. ამის შესახებ მან პარტიის ოფისში გამართულ ბრიფინგზე განაცხადა.

როგორც იგი განმარტავს, მოლაპარაკებების დაწყების შემდეგ მათ ოპოზიციას რამდენიმე ვარიანტი შესთავაზეს: საარჩევნო უბნების შედეგების გადათვლა, საარჩევნო უბნებში დამონტაჟებული კამერის ჩანაწერების გამოყენება და სატელევიზიო დებატები არჩევნებთან დაკავშირებით.

მისი თქმით, აღნიშნული შეთავაზების მიმართ დადებითი პოზიცია ჰქონდათ ცალკეული პარტიების წარმომადგენლებს, რომლებმაც 2020 წლის არჩევნებში პირველად მიიღეს მონაწილეობა და კომისიებში საკუთარი წარმომადგენელი არ ჰყავდათ. კობახიძე ამბობს, რომ მათგან განსხვავებით, ხისტი პოზიცია ჰქონდათ ნაციონალურ მოძრაობასა და ევროპულ საქართველოს.

"[ეს პარტიები] ყველაზე კარგად უწყიან, რომ არჩევნების გადამოწმება სწორედ, რომ არჩევნების სამართლიანად ჩატარებას დაადასტურებდა. როგორც ჩანს, ჩვენი მხრიდან ამ პარტიებთან არჩევნების გადამოწმების საკითხზე ამდენი დროის დახარჯვა, შეცდომა იყო. გუშინდელ მოლაპარაკებებსა და მოლაპარაკებების შემდეგ გამოიკვეთა, რომ ცალკეული რადიკალური ოპოზიციური პარტიები ჩვენი ელჩების ფასდაუდებელი ძალისხმევის მიუხედავად, ყველა ღონეს ხმარობენ მოლაპარაკებების ჩასაშლელად და პოლიტიკური კრიზისის ხელოვნურად შესაქმნელად", — განაცხადა კობახიძემ.

კობახიძის თქმით, მოლაპარაკების ჩაშლაზე მიუთითებდა ისიც, რომ საარჩევნო რეფორმასთან დაკავშირებით მიღწეული შეთანხმების მიუხედავად მათ რამდენიმე ახალი ულტიმატუმი წამოაყენა, რაც "დემოკრატიული სისტემის სტაბილური განვითარების ინტერესებთან" წინააღმდეგობაში მოდის.

"აშკარაა, რომ რადიკალურ ოპოზიციას ამოძრავებს ერთადერთი ინტერესი, ეს არის ამბოხი დემოკრატიული, კონსტიტუციური წესრიგის წინააღმდეგ, რომლის ერთ-ერთ ინსტრუმენტად საპარლამენტო საბოტაჟს განიხილავენ", — აღნიშნა კობახიძემ.

მეათე მოწვევის პარლამენტის პირველი სხდომა 11 დეკემბერს არის ჩანიშნული. ოპოზიცია პარლამენტში შესვლას კვლავ არ აპირებს. შემჭიდროვებული ვადების პირობებში ელჩების შუამავლობის გრძელდება მოლაპარაკება ქართულ ოცნებასთანაც.

ორივე მხარე აცხადებს, რომ მათ აქვთ თანხვედრა საარჩევნო რეფორმებთან დაკავშირებით, თუმცა რიგგარეშე არჩევნების დანიშვნისა და პლებისციტის ჩატარების საკითხში კვლავ აზრთა სხვადასხვაობაა.

პარტია მოქალაქეების ლიდერმა, ალეკო ელისაშვილმა 9 დეკემბერს განაცხადა, რომ საარჩევნო კანონმდებლობისა და საარჩევნო ადმინისტრაციების რეფორმებზე შეთანხმების შემთხვევაში პარლამენტში შევა. მის ამ განცხადებას ოპოზიციის ნაწილის მხრიდან კრიტიკა მოჰყვა.