ქართული ოცნების აღმასრულებელმა მდივანმა, ირაკლი კობახიძემ განაცხადა, რომ თუ ოპოზიცია პარლამენტში შესვლაზე უარს იტყვის, აამოქმედებენ მექანიზმს, ანუ მისცემენ მეტ დროს, რომ მოგვიანებით შევიდნენ.

"მანდატების დათმობას რაც შეეხება, ეს მათი გადასაწყვეტია, მაგრამ ჩვენ რა მექანიზმიც გვქონდა, თუ ზოგიერთი პარტია გადაწყვეტს, არ შემოვიდეს პარლამენტში, ამ მექანიზმს ავამოქმედებთ, ანუ მეტ დროს დავუტოვებთ ამ პარტიებს იმისათვის, რომ თუნდაც მოგვიანებით შემოვიდნენ. არ შეუწყდებათ მათ სადეპუტატო უფლებამოსილება. ჩვენი ამოცანაა, რომ ყველა პარტიამ მოაწეროს ხელი ამ შეთანხმებას, რომელზეც არის საუბარი ელჩების თანდასწრებით. ძალიან დიდი იმედი გვაქვს, რომ პარასკევს ყველა პარტია იქნება შეკრებილი პარლამენტში. ძალიან ბევრი მიმართულებით გვაქვს წარმატება, გაგრძელდა პროცესი. საარჩევნო რეფორმის ბევრ ასპექტში გვაქვს შეჯერებული პოზიცია", — განაცხადა ირაკლი კობახიძემ.

აშშ-ს ელჩი, კელი დეგნანი, ოპოზიციისა და სახელისუფლებო გუნდის წარმომადგენლებთან ერთად შეხვედრებს მართავენ, რათა პოლიტიკური კონსენსუსი შედგეს და კრიზისი, რომელიც 31 ოქტომბრის არჩევნებს მოჰყვა, განიმუხტოს. ახლახანს დასრულდა შეხვედრების მეოთხე რაუნდი.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.

დღეს კი გავრცელდა ინფორმაცია, რომ ზოგიერთი ოპოზიციონერი პარლამენტში შესვლას აპირებს. ამ დროისთვის, ოპოზიციაში აცხადებენ, რომ შესვლას არ აპირებენ და თუ ვინმე აპირებს, ეს მისი პირადი პასუხისმგებლობაა.