ვენესუელას პრეზიდენტის, ნიკოლოს მადუროს პოლიტიკურმა მხარდამჭერებმა კონგრესის არჩევნებში, რომელსაც ოპოზიცია ბოიკოტს უცხადებდა და საერთაშორისო საზოგადოება აკრიტიკებდა, გამარჯვება მოიპოვეს. ამის შესახებ ინფორმაციას AP News ავრცელებს.

მედიის განცხადებით, ეს გამარჯვება მადუროს კონტროლს ანიჭებს იმ უკანასკნელ სამთავრობო შტოზე, რომელიც აქამდე მის ხელში არ იყო. შესაბამისად, საპარლამენტო ინსტიტუციაც სოციალისტური პარტიის დაქვემდებარებაში გადადის.

"ჩვენ, ვენესუელელი ხალხის ხმათა უმრავლესობით, აღვადგინეთ ეროვნული ასამბლეა. ეს შესანიშნავი და ეჭვგარეშე გამარჯვებაა დემოკრატიისთვის", — განაცხადა მადურომ არჩევნების შემდეგ.

ვენესუელას ეროვნული საარჩევნო საბჭოს პრეზიდენტმა, ინდირა ალფონსომ განაცხადა, რომ მაუდროს გაერთიანებულმა სოციალისტურმა პარტიამ და მისმა მოკავშირეებმა არჩევნებში ნაციონალური ასამბლეის ადგილების 67% აიღეს. მისი თქმით, რეგისტრირებული 20 მილიონი ამომრჩევლიდან მონაწილეობას მხოლოდ 31% იღებდა.

ბოლო საპარლამენტო არჩევნები 2015 წელს ჩატარდა და მაშინ უმრავლესობა ოპოზიციამ მოიპოვა. დეპუტატებმა მადუროს იმპიჩმენტის პროცედურა აამოქმედეს, რომელიც შემდგომში შეაჩერეს. 2017 წელს პარლამენტარებმა პრეზიდენტის თანამდებობიდან გადაყენებას უყარა კენჭი, თუმცა გადაწყვეტილება უზენაესმა სასამართლომ გააუქმა. მადუროს ლეგიტიმურობას არ აღიარებს ლათინური ამერიკისა და დასავლეთის ქვეყნების დიდი ნაწილი, მათ შორის საქართველო.

ოპოზიციური პარლამენტის გამო მადურომ საკუთარი საკანონმდებლო ორგანო ჩამოაყალიბა, რომელიც ამ დრომდე მას უჭერს მხარს. გარდა ამისა, მას მხარს უჭერს საკონსტიტუციო სასამართლო და არმიის დიდი ნაწილი.