სექტემბრის მიწურულს ინგლისში მდებარე კორნუელური სელაპების თავშესაფარმა განაცხადა, რომ მათი ერთ-ერთი ბინადარი, წავი, სახელად ჰარისი, "თავს დაკარგულად" გრძნობდა: მას პარტნიორი მოულოდნელად დაეღუპა. ეს ამბავი ხუმრობა არ გეგონოთ, წავები მონოგამები არიან და ხშირად მთელი ცხოვრება ერთ პარტნიორთან ერთად თანაცხოვრობენ, ამიტომაც, ცხადია, მსგავსი ტრაგედია წავი ჰარისისთვის დიდი დარტყმა აღმოჩნდა.

სწორედ ამ მძიმე ვითარების შესამსუბუქებლად თავშესაფარმა ინტერნეტში ჰარისისთვის პარტნიორის ძიება დაიწყო: "ძალიან მზრუნველი ვარ, მიყვარს ჩახუტება და კარგი მსმენელიც ვარ. ისე მეყვარები, როგორც არცერთ წავს ამ ქვეყანაზე!", — ვკითხულობთ ჰარისის აღწერაში, რომლითაც ის მისთვის შესაფერის პარტნიორს ეძებდა.

ფოტო: Cornish Seal Sanctuary

ასეთი საოცნებო დაპირებების შემდეგ, ცხადია, შესაბამისი კანდიდატის გამოჩენამაც არ დააყოვნა: აღმოჩნდა, რომ ინგლისში, ქალაქ სკარბოროში მდებარე ასევე ზღვის ცხოველების თავშესაფარში ცხოვრობს წავი, სახელად პამპკინი, რომელსაც ჰარისის მსგავსად პარტნიორი დაეღუპა და თავს მარტოსულად გრძნობდა.

როგორც ჩანდა, ამ ორი წავის ბედი ჯერ კიდევ ზეცაში გადაწყდა! თავშესაფრებსაც სხვა რაღა დარჩენოდათ: სარისკო იყო, მაგრამ ჰარისმა 400 მილი იმოგზაურა და პამპკინს ჩააკითხა.

სულ რამდენიმე დღის წინ ამ ემოციური ისტორიის გასაოცარი გაგრძელების შესახებ გავიგეთ: გამოვლილი საერთო მწუხარების მიუხედავად, ჰარისმა და პამპკინმა იპოვეს ძალა, რომ ერთმანეთისთვის გულის კარი გაეხსნათ!

ფოტო: SEA LIFE Scarborough / Facebook

როგორც თავშესაფრიდან იუწყებიან, წავების "პაემნები" წარმატებული აღმოჩნდა: მათ ერთმანეთს გაუგეს და არც მოფერებაზე უთქვამთ უარი.

ფოტო: SEA LIFE Scarborough

ამის შესახებ თავად ჰარისმაც "აცნობა" თავის თავშესაფარს:

"მინდოდა გცოდნოდათ, რომ უსაფრთხოდ ჩავაღწიე სკარბოროს თავშესაფარში და პამპკინთან ყველაფერი კარგად მიდის. ესეც ჩვენი რამდენიმე ფოტო, თუ როგორ ვეწყობი ახალ ბინაში..." — ვკითხულობთ ჰარისის წერილში.

ფოტო: Cornish Seal Sanctuary

რადგანაც ეს წყვილი უკვე განუყრელი გახდა და მათ ვეღარავინ დააშორებს, ჰარისი სკარბოროში მდებარე თავშესაფარში პამპკინთან ერთად იცხოვრებს.

"ძალიან მოგვენატრება, მაგრამ იმ ყველაფრის შემდეგ, რაც ჰარისმა და პამპკინმა გამოიარეს, ეს სრულყოფილი ზღაპრული დასასრულია მათთვის, რომ სიყვარული კვლავ იპოვეს", — აცხადებენ ჰარისის მშობლიურ კორნუელური სელაპების თავშესაფარში.