ქართული ოცნების ყოფილი წევრი და პარტია სამართლიანობისთვის დამფუძნებელი, ეკა ბესელია მიიჩნევს, რომ არჩევნების საკითხზე პლებისციტის ჩატარება დროის გაყვანა და ქართული ოცნების თამაშია. ამის შესახებ მან ლეიბორისტული პარტიის ოფისში ოპოზიციის მოლაპარაკებების შემდეგ განაცხადა. ბესელია თავის პოზიციას იმით ასაბუთებს, რომ პლებისციტის შედეგების გათვალისწინება კონსტიტუციით სავალდებულო არ არის.

"არც ერთი წინაპირობა არ უნდა იყოს განხილული, როგორც არჩევნების ალტერნატივა. პლებისციტი არ უნდა იყოს ალტერნატივა არჩევნების დანიშვნის მოთხოვნისა. ეს თუ არის განხილული, როგორც გზა, ერთ-ერთი ვერსია, როგორ უნდა დაინიშნოს არჩევნები, ესეც საკამათოა. რომც თქვას ხალხმა, გვინდა არჩევნებიო, ხელისუფლებას შეუძლია არ დანიშნოს, რადგან პირდაპირ წერია კონსტიტუციაში, რომ ეს სავალდებულო არ არის. თუ სავალდებულო არ არის, ვერც მოთხოვ. ამიტომ ამ პროცესში შეყოლა, ამ პროცესში შესვლა მგონია დროის გაყვანაც, "ოცნების" თამაშიც", — აცხადებს ბესელია.

ოპოზიციური პარტიების წარმომადგენლები დღეს ლეიბორისტული პარტიის ოფისში კიდევ ერთხელ შეიკრიბნენ და გუშინ, 4 დეკემბერს, ფასილიტატორ ელჩებთან შეხვედრის შედეგებზე იმსჯელეს. ოპოზიციონერი ლიდერების შეკრებამდე, ვრცელდებოდა ინფორმაცია, რომ დოკუმენტში, რომელიც მათ ელჩების საშუალებით გაუგზავნეს ქართულ ოცნებას, ერთ-ერთი პუნქტი სწორედ რიგგარეშე არჩევნების ჩატარების შესახებ პლებისციტს შეეხებოდა.