ერთიანი ნაციონალური მოძრაობის წევრი, კობა ნაყოფია, ფასილიტატორ ელჩებთან შეხვედრის შემდეგ აცხადებს, რომ ოპოზიციის მოთხოვნებში ფუნდამენტური ცვლილებები არ არის. მისი თქმით, მოთხოვნები მხოლოდ დაკონკრეტდა და წერილობითი სახე მიიღო.

"ფუნდამენტურად, ჩვენს მოთხოვნებში ცვლილებები არ არის. ჩვენ, უბრალოდ, დავაკონკრეტეთ, დეტალიზებული წერილობითი მოთხოვნები გადავეცით ფასილიტატორებს. გვაქვს პირობა, რომ არ უნდა ვილაპარაკოთ ამ დეტალებზე მედიასთან. ფუნდამენტურად არაფერი არ შეცვლილა, რაც ნიშნავს იმას, რომ ჩვენი მოთხოვნები, რაც იყო დაკავშირებული ახალ არჩევნებთან, რაც იყო დაკავშირებული პოლიტიკურ პატიმრებთან, თუ სხვა საკითხებთან, ყველაფერი ძალაში რჩება. ჩვენ გადავეცით წერილობით მოთხოვნები და ველოდებით ასეთივე წერილობით პასუხს ქართული ოცნებისგან", — განაცხადა ნაყოფიამ.

ევროკავშირის ელჩი საქართველოში, კარლ ჰარცელი და აშშ-ის ელჩი, კელი დეგნანი, ოპოზიციისა და სახელისუფლებო გუნდის წარმომადგენლებთან ერთად შეხვედრებს მართავენ, რათა პოლიტიკური კონსენსუსი შედგეს და კრიზისი, რომელიც 31 ოქტომბრის არჩევნებს მოჰყვა, განიმუხტოს.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და ბოიკოტი გამოუცხადეს არჩევნების მეორე ტურსაც, რომელიც 21 ნოემბერს ჩატარდა. მასში არცერთი ოპოზიციური პარტია მონაწილეობდა. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა