თბილისის ზღვის ჰოსპიტალის დაყაჩაღების ბრალდებით 2 პირი დააკავეს. შინაგან საქმეთა სამინისტროში აცხადებენ, რომ ბრალდებულები 36 და 47 წლის არიან.

ჰოსპიტალი 1-ლ დეკემბერს დააყაჩაღეს. გამოძიების ინფორმაციით, კლინიკას ორი პირი ტტ-ს სისტემის პისტოლეტითა და სანადირო თოფით თავს დაესხა. უწყებაში ამბობენ, რომ თავდამსხმელებმა ჰოსპიტლის დარაჯის მიმართულებით რამდენჯერმე გაისროლეს, რის გამოც დაზიანდა მიმღების შესასვლელი კარების მინა, შემდეგ მათ შენობაში შეაღწიეს, მიმღები განყოფილების სალაროდან წაიღეს 3 500 ლარი და შემთხვევის ადგილიდან მიიმალნენ.

გამოძიება საქართველოს სისხლის სამართლის კოდექსის 179-ე მუხლის მე-2 ნაწილის "ბ" ქვეპუნქტით მიმდინარეობს, რაც ჯგუფურად ჩადენილ ყაჩაღობას გულისხმობს. დანაშაული 6-დან 9 წლამდე ვადით თავისუფლების აღკვეთას ითვალისწინებს.