საფრანგეთის საგარეო საქმეთა სამინისტროს ცნობით, პარიზი თვითაღიარებული მთიანი ყარაბაღის დამოუკიდებლობას არ აღიარებს. უწყებაში აცხადებენ, რომ ახლა მათთვის პრიორიტეტული კონფლიქტის შედეგად გადაადგილებული პირების უსაფრთხოდ დაბრუნების უზრუნველყოფაა.

"ჩვენი პასუხისმგებლობა. როგორც ეუთოს მინსკის ჯგუფის თანათავმჯდომარე ქვეყნის, მთიანი ყარაბაღის კონფლიქტის მოლაპარაკების გზით მოგვარებაზე მუშაობაა. კერძოდ, სამომავლო სტატუსზე და ამ მოლაპარაკების შედეგი არ შეიძლება წინასწარ და ცალმხრივად განისაზღვროს", — აღნიშნულია უწყების განცხადებაში.

25 ნოემბერს, საფრანგეთის სენატმა 305 ხმით 1-ის წინააღმდეგ მიიღო რეზოლუცია, რომელიც საფრანგეთის მთავრობის მიერ მთიანი ყარაბაღის დამოუკიდებლობის აღიარებას ითვალისწინებდა. თუმცა, რეზოლუცია სარეკომენდაციო ხასიათის იყო და ეს იმას არ ნიშნავდა, რომ აღმასრულებელი ხელისუფლება მას დაამტკიცებდა.

რეზოლუციაში, ასევე, დაგმობილია აზერბაიჯანის სამხედრო აგრესია, რომელიც თურქეთის მხარდაჭერითა და უცხოელი დაქირავებული მებრძოლების მეშვეობით განხორციელდა.