საქართველოს რესპუბლიკური პარტიის ეროვნულმა კომიტეტმა პოლიტიკურ მდივნად თამარ კორძაია აირჩია. აღმასრულებელ სამდივნოში ცვლილებებს ეროვნული კომიტეტის წევრებმა დღეს, 21 იანვარს, უყარეს კენჭი. კორძაია აღნიშნულ თანამდებობაზე დავით ბერძენიშვილს ჩაანაცვლებს, რომელიც თავის მხრივ საარჩევნო-პოლიტიკური ანალიზის მდივანი გახდა.

რესპუბლიკური პარტიის წესდების მიხედვით, პოლიტიკური მდივანი თავმჯდომარის შემდეგ პარტიაში მეორე თანამდებობის პირია.

პარტიის ეროვნულმა კომიტეტმა პარტიის აღმასრულებელ სამდივნოში ახალი წევრი, ინგა მაღრაძე აირჩია, რომელიც თვითმმართველობის და რეგიონული პოლიტიკის მიმართულებას უხელმძღვანელებს.

რესპუბლიკური პარტიის წესდების მიხედვით, აღმასრულებელ სამდივნოს შემადგენლობას პარტიის თავმჯდომარის წარდგინებით, ეროვნული კომიტეტი ამტკიცებს. ამჟამად სამდივნოს 7 წევრი ჰყავს.