დაავადებათა კონტროლის ეროვნული ცენტრის დირექტორის, ამირან გამყრელიძის თქმით, საქართველოშიც და მსოფლიოშიც კორონავირუსის დადასტურებული შემთხვეევბიც რიცხვი იმაზე ბევრად მეტია, ვიდრე ეს მონაცემებში ფიქსირდება. მისი თქმით, სტატისტიკაში ასახულია ის შემთხვევები, რაც ლაბორატორიულად დასტურდება, ხოლო ე.წ. შეფასებითი მაჩვენებელი გაცილებით დიდია.

"პირდაპირ გეტყვით, რომ ჩვენ 4 ათასამდე არ გვაქვს, უფრო მეტი გვაქვს. 4 ათასი ეს არის, რაც ვლინდება და დიაგნოსტირდება. ეს 4 ათასი, არის ადამიანები, ვისაც სიმპტომები აწუხებთ, მიდიან გასატესტად და ა.შ. უმრავლესობა დანარჩენი შემთხვევებისა არის უსიმპტომო ან მსუბუქი შემთხვევები, რომელთაც გადააქვთ სახლში და მათი დიაგნოსტირება არ ხდება. ეს არ ხდება მხოლოდ კორონავირუსის დროს, ეს არის გრიპის, სხვა ვირუსული ინფექციების დროს. ჩვენ რომ ვამბობთ, დღეს დილისთვის 59 მილიონი ადამიანია მსოფლიოში ინფიცირებული, ეს 59 კი არ არის ეს სამჯერ მეტია. 59 მილიონი არის, ვინც ლაბორატორიულად დადასტურდა. იგივე ჩვენ დღეს რაც გვაქვს, არის ლაბორატორიულად დადასტურებული. თორემ, ე.წ. შეფასებითი მაჩვენებელი გაცილებით დიდია", — განაცხადა გამყრელიძემ.

24 ნოემბერს საქართველოში კორონავირუსის 3 128 ახალი შემთხვევა დადასტურდა, გამოჯანმრთელდა — 3 045, გარდაიცვალა — 39. ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 111 818-ს. ჯამში გამოჯანმრთელებულთია 92 215 ადამიანი, გარდაიცვალა — 1 051.

ეპიდემიოლოგები და სამთავრობო გუნდის წევრები ამბობდნენ, რომ ვირუსის პრევენციისთვის შეზღუდვები აუცილებელია, თუმცა სრული "ლოქდაუნი" ქვეყნის ეკონომიკას დააზარალებს, ამიტომ ეტაპობრივად, წერტილოვანი შეზღუდვები დაწესდება.