ევროპის საბჭოს საპარლამენტო ასამბლეის საქართველოს მონიტორინგის ჯგუფის თანამომხსენებლები ტიტუს კორლატეანი და კლოდ კერნი მოუწოდებენ ყველა პოლიტიკურ პარტიას, მიიღონ საპარლამენტო მანდატები, რომლებიც მათ არჩევნების შედეგად მიიღეს. ამის შესახებ ისინი ერთობლივ წერილში საუბრობენ.

"არჩევნების შედეგად მრავალფეროვანი პარლამენტი ჩამოყალიბდა, სადაც მმართველი პარტია ძლიერი ოპოზიციის წინაშე აღმოჩნდება, რაც სათანადო საპარლამენტო ზედამხედველობას უზრუნველყოფს. ერთადერთი შესაფერისი ადგილი, სადაც სხვადასხვა პოლიტიკური შეხედულებისა თუ გამოწვევის განხილვა შეიძლება, არის პარლამენტი. ამიტომაც საქართველოს დემოკრატიული კონსოლიდაციისთვის მოვუწოდებთ ყველა პარტიას, მიიღონ მანდატები", — აცხადებენ თანამომხსენებლები.

გარდა ამისა, კორლატეანი და კერნი იზიარებენ არჩევნებთან დაკავშირებით სადამკვირვებლო მისიის შეფასებებს, თუმცა საუბრობენ არაერთ დარღვევაზე, მათ შორის ადმინისტრაციული რესურსის გამოყენებასა და ამომრჩეველის მიმართ ზეწოლაზე.

"ეს ბრალდებების სერიოზულ შეშფოთებას იწვევს და პასუხისმგებელმა ორგანოებმა ეს გამჭვირვალედ და დამაკმაყოფილებლად უნდა გამოიძიონ", — აცხადებენ ისინი.

პოლიტიკური დიალოგისგენ და ამომრჩეველთა არჩევანის პატივისცემისკენ საქართველოს პოლიტიკურ პარტიებს ევროპარლამენტარებმაც მოუწოდეს.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე, რომელიც 21 ნოემბერს ჩატარდა, და არ აპირებენ პარლამენტში შესვლას.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

გაიგეთ მეტი: