ბრალდებულის ადვოკატის ირმა ჭკადუას თქმით, წერეთელზე მიკროსაფინანსოში აყვანილი მძევლები აბსოლუტურად სოლიდარულები იყვნენ და "საკმაოდ კომფორტულად" გრძნობდნენ თავს.

"იქ მყოფი ადამიანები აბსოლუტურად სოლიდარულები იყვნენ ბატონი ლევანის მიმართ, როდესაც ის მოთხოვნებს აცნობდა საზოგადოებას იქ მყოფი ადამინები ეუბნებოდნენ, რომ 7% ბევრია და უნდა დაეწიათ, შესაბამისად დამრჩა შთაბეჭდილება, რომ არა თუ ძალადობას ან რაიმე იძულებას, ან მძევლად ხელში ჩაგდებას ჰქონდა ადგილი, არამედ საკმაოდ კომფორტულად გრძნობდნენ თავს ყველანი ერთად", — განაცხადა ჭკადუამ.

ბრალდებულ ზურაბაშვილს დღეს ბრალი წარედგინება.

20 ნოემბერს ერთი პირი წერეთლის გამზირზე მიკროსაფინანსო ორგანიზაცია MBC-ში შეიჭრა და მძევლები აიყვანა.

რამდენიმესაათიანი სპეცოპერაციის შემდეგ ყველა მძევალი გათავისუფლდა, ხოლო თავდამსხმელი დააკავეს.

შენობიდან კადრები ინტერნეტში მალევე გავრცელდა. სავარაუდო თავდამსხმელი მძევლებს ეუბნება, რომ პირდაპირი ეთერი ჩართონ, რათა მედიებმა კადრები ნახონ და გააშუქონ. ის მოითხოვდა, რომ პარლამენტის დეპუტატები და ამ არჩევნებში მონაწილე პოლიტიკოსები შეკრებილიყვნენ და 3 კანონი მიეღოთ: აზარტული თამაშების აკრძალვა, სესხის პროცენტად მაქსიმუმ 7%-ის განსაზღვრა და წამლების ფასის შემცირება. გავრცელებულ კადრებში ის არ ასახელებს, რა შემთხვევაში გაათავისუფლებდა მძევლებს და არც მომლაპარაკებელს ითხოვდა.