პარტია მოქალაქეების ლიდერი, ალეკო ელისაშვილი ამბობს, რომ ბოიკოტის ალბათობა უფრო დიდია, ვიდრე კომპრომისამდე მისვლა. ამასთან, ელისაშვილი რუსთავი 2-ის ეთერში ამბობს, რომ მმართველი გუნდის ტონი ოპოზიციის მიმართ დარბილდა, რაც კარგია.

"განცხადების დარბილება, ტონის შერბილება და რაღაცა მოთელვითი პროცესი, რაც მიდის ელჩებთან... რადგან ელჩები მარტო ჩვენ კი არ გვხვდებოდნენ, მეორე მხარესაც ხვდებიან და მცდელობა არის, რომ სადღაც მოიძებნოს ის წეrტილები, სადაც კვეთა შეიძლება. არ ვიცი. შეიძლება არც არაფერი გამოვიდეს და ისევ ვიყოთ, როგორც ვართ —აქეთ ბოიკოტის რეჟიმში და ქუჩაში. არც ამას გამოვრიცხავ და ამის ალბათობა გაცილებით უფრო დიდია, ვიდრე ის, რომ კომპრომისამდე მივიდეთ. ჯერჯერობით გამოსავალს ხელისუფლებას ვთავაზობთ ჩვენ და მათი მხრიდან არის მხოლოდ დუმილი", — განაცხადა ელისაშვილმა.

21 ნოემბერს მაჟორიტარი დეპუტატების არჩევისთვის მეორე ტური საქართველოს მასშტაბით 17 ოლქში გაიმართება: მთაწმინდა, კრწანისი; ვაკე; საბურთალო; ისანი; სამგორი; დიდუბე-ჩუღურეთი; ნაძალადევი; გლდანი; თელავი, ახმეტა, ყვარელი და ლაგოდეხი; მცხეთა, დუშეთი, თიანეთი და ყაზბეგი; რუსთავი, გარდაბანი; ხაშური, ქარელი; ზესტაფონი, ტყიბული, თერჯოლა, ბაღდათი; ქუთაისი; ზუგდიდი; ბათუმი; ხელვაჩაური, ქედა, შუახევი და ხულო.

პირველი ტურის შედეგებს ოპოზიცია არ აღიარებს და არჩევნების გაყალბებაზე საუბრობს. მათ მეორე ტურში მონაწილეობაზე უარი თქვეს და განაცხადეს, რომ არც პარლამენტში შევლენ. ტექნიკურად მათი სახელები ბიულეტენებში ჩაწერილი იქნება, თუმცა, როგორც ოპოზიციაში ამბობენ, მათ არც საარჩევნო კამპანია ჩაუტარებიათ და საჯაროდაც მოქალაქეებს მოუწოდებენ, არ წავიდნენ არჩევნებზე.

ამ ხნის განმავლობაში მმართველ გუნდში ამტკიცებდნენ, რომ ოპოზიცია მეორე ტურისთვის კოორდინატორებისა და ამომრჩევლის მობილიზებას აპირებდა.

მეორე ტური გაიმართება იმ ვითარების ფონზეც, რომ პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.