ქართული ოცნების გენერალურმა მდივანმა და თბილისის მერმა, კახა კალაძემ ოპოზიციას პარლამენტში შესვლისკენ კიდევ ერთხელ მოუწოდა. თავისი განცხადება მერმა ფეისბუქზე გამოაქვეყნა.

"იქნებ ვცადოთ იმ პოლარიზაციის დასრულება, რომელიც დღეს გვაქვს და ნამდვილად არ მოსწონთ ჩვენს მოქალაქეებს, რადგან ყველას სტრესულ გარემოში ამყოფებს. მე კი, როგორც ქალაქის მერი, პასუხისმგებლობას ვიღებ, რომ ძალ-ღონეს არ დავიშურებ ამისთვის", — აცხადებს ქალაქის მერი.

კახა კალაძემ მიმართა ოპოზიციის წარმომადგენლებს, რათა მოუსმინონ სტრატეგიულ პარტნიორებს და არ გაზარდონ "რისკები ჩვენი ქვეყნისთვის".

"ამიტომ, მინდა მივმართო ოპოზიციის თითოეულ წარმომადგენელს — ჩვენ უნდა მოვახერხოთ საერთო ენის გამონახვა, შევიდეთ პარლამენტში და პარლამენტის ტრიბუნიდან ვუპასუხოთ ჩვენი ქვეყნის საერთო გამოწვევებს, რადგან ამ ქვეყნის მომავალი ყველამ ერთად უნდა ვაშენოთ", — წერს კახა კალაძე.

21 ნოემბერს არჩევნების მეორე ტური უნდა გაიმართოს. ოპოზიცია პარლამენტში შესვლაზე კვლავ უარს ამბობს და არც მეორე ტურში აპირებს მონაწილეობას. ამასთან, ისინი გეგმავენ, რომ არჩევნების დღეს საპროტესტო აქცია უნდა მოაწყონ, თუმცა რა ფორმით, ჯერ უცნობია.