რუსი ოპოზიციონერის, ალექსეი ნავალნის მოწამვლასთან დაკავშირებით აშშ-ს კონგრესის წარმომადგენლობით პალატაში რეზოლუცია მიიღეს. დოკუმენტში, რომელიც სარეკომენდაციო ხასიათს ატარებს, კონგრესმენები მოუწოდებენ ხელისუფლებას რუსეთის წინააღმდეგ სანქციები გაატარონ.

რეზოლუციაში კონგრესმენებმა დაგმეს ნავალნიზე თავდასხმა და მოუწოდეს აშშ-ს სახელმწიფო მდივანსა და ფინანსთა მინისტრს თავდასხმაში მონაწილეთა მიმართ სანქციები გაატარონ. დოკუმენტში კონკრეტული სახელები ჩამოთვლილი არაა.

რუსი ოპოზიციონერის მოწამვლის გამო ევროკავშირმა და დიდმა ბრიტანეთმა სანქციები ექვსი პირისა და ქიმიური იარაღის კვლევითი ინსტიტუტის წინააღმდეგ გაატარეს. შეზღუდვების ქვეშ მოყვნენ უსაფრთხოების ფედერალური სამსახურის უფროსი და პრეზიდენტის ადმინისტრაციის პირველი მოადგილე.

რუსეთმა საპასუხო სანქციები გაატარა გერმანიისა და საფრანგეთის წინააღმდეგ. როგორც რუსეთის საგარეო საქმეთა მინისტრმა, სერგეი ლავროვმა განაცხადა, რომ სანქციები შეეხებათ მმართველი პირების აპარატის თანამშრომლებს.

მიმდინარე წლის 20 აგვისტოს ალექსეი ნავალნი თვითმფრინავში შეუძლოდ გახდა, რის შემდეგაც ის ომსკის საავადმყოფოში გადაიყვანეს. ორი დღის შემდეგ ოჯახის მოთხოვნით, ოპოზიციონერი ბერლინის კლინიკა შარიტეში გაამგზავრეს. გერმანელი ექიმები მივიდნენ დასკვნამდე, რომ ნავალნი "ნოვიჩოკის" ჯგუფის ქიმიური ნივთიერებით მოწამლეს. იგივე საფრანგეთისა და შვეიცარიის ლაბორატორიებმა დაადასტურეს.

რუსეთის ხელისუფლება აცხადებს, რომ მომხდართან კავშირი არ აქვთ, ნავალნის მოწამვლის ვერსიას უარყოფენ და გერმანიისგან უფრო მეტი ინფორმაციის მიწოდებას მოითხოვენ.

ალექსეი ნავალნი დარწმუნებულია, რომ მისი მოწამვლის უკან პრეზიდენტი ვლადიმერ პუტინი დგას.