2016 წელს ცენტრალური საარჩევნო კომისიის თანამშრომლებმა ანაზღაურების სახით 14 941 628 ლარი მიიღეს. აქედან 9 475 693 ლარი თანამდებობრივი სარგოა, 2 080 874 ლარი - პრემია, დანამატი კი - 3 385 060 ლარი.

ამ თანხიდან ნახევარ მილიონზე მეტი ცესკოს თანამდებობის პირებზე - თავმჯდომარეზე - თამარ ჟვანიაზე, მის მოადგილზეზე - გიორგი შარაბიძეზე და ცესკოს მდივანზე გიორგი ჯავახიშვილზე მოდის. მათგან ყველაზე მეტი შემოსავალი 197 308 ლარი ცესკოს თავმჯდომარემ მიიღო, შედარებით ნაკლები - 168 608 ლარი - მისმა მოადგილემ, თითქმის იგივე თანხა - 165 021 ლარი კი ცესკოს მდივანმა. სამივე მათგანის შემთხვევაში თანამდებობრივ სარგოდ მიღებული შემოსავალი ჯამში თითქმის პრემიისა და დანამატის ტოლია.

2016 წლის მონაცემებით, ცესკოს შტატში 90 თანამშრომელია, რომლებმაც ჯამში 6 264 680 ლარი მიიღეს, ამ შემთხვევაშიც თითქმის ნახევარი პრემია და დანამატია. ცესკოს შტატგარეშე და ოლქის თანამშრომლებმა სახელფასო სარგოს, დანამატისა და პრემიის სახით 8 146 012 ლარი მიიღეს. თუმცა, ამ შემთხვევაში პრემია და დანამატის ჯამი თითქმის 3-ჯერ ჩამორჩება თანამდებობრივი სარგოს სახით გაცემულ თანხას.

ცესკოს თანამშრომლებმა 2012 წლის 1 იანვრიდან 2017 წლის 10 იანვრის ჩათვლით 56 737 470 ლარი მიიღეს, საიდანაც 37 542 550 - თანამდებობრივი სარგოა, დარჩენილი - 19 194 920 ლარი კი პრემია და დანამატი იყო.

5 წლის განმავლობაში ცესკოს თავმჯდომარეებმა, ზურაბ ხარატიშვილმა და თამარ ჟვანიამ, ჯამში 780 960 ლარი გამოიმუშავეს. აქედან ნახევარ მილიონზე მეტი - 547 232 ლარი თამარ ჟვანიას შემოსავალია. მათ შორის, 5 500 ლარი 2017 წლის საახალწლო-საშობაო პრემიაა.

ყველაზე ცოტა თანხა ხელფასების, პრემიებისა და დანამატების სახით ცესკომ 2015 წელს - 8 216 457 ლარი გასცა, ყველაზე მეტი, თითქმის ორმაგი კი - 2016 წელს - 14 941 628 ლარი.

ცესკოს თანამდებობის პირებისა და შტატით მომუშავე თანამშრომლების შემოსავლები

ფოტო: infogr.am