მოქალაქეების ლიდერის, ალეკო ელისაშვილის განცხადებით, თეა წულუკიანისგან პოლიტიკურ კულტურაზე შენიშვნას არ მიიღებს, იმიტომ, რომ ქართული ოცნება უკვე წლებია, თავს არიდებს პოლიტიკურ დებატებს. ამის შესახებ ელისაშვილმა რ2-ის ეთერში ისაუბრა.

"პოლიტიკური კულტურას ნუ გვასწავლის თეა წულუკიანი, იმიტომ, რომ ისინი უკვე წლებია თავს არიდებენ პოლიტიკურ დებატებს, ერთ-ერთ ყველაზე მნიშვნელოვან ელემენტს პოლიტიკური კულტურისა და დემოკრატიის წინასაარჩევნო პერიოდში განსაკუთრებით. რაც შეეხება საბურთალოს, ახლა რომ ვითომ გულდაწყვეტილია [თეა წულუკიანი], რომ მე არ ვმონაწილეობ, თურმე მე ვაყენებ საბურთალოს ამომრჩეველს შეურაცხყოფას. შეურაცხყოფა იყო რა — 93 უბანი იყო, + 3 კორონა უბანი,ოქმების 54%-ში იყო დისბალანსი. ეს ნორმალურია?! უნდა ვთქვა, რომ უი, კი, არაუშავს, ნახევარზე მეტი ოქმები არეულ-დარეულია, მაინც წავალო? ჩემთვის მეორე ტური არის გაყალბების მეორე ტური", — განაცხადა ელისაშვილმა.

წულუკიანმა იმავე ეთერში დღეს თქვა, რომ მისთვის აბსოლუტურად გაუგებარია, რატომ ამბობს ალეკო ელისაშვილი მეორე ტურზე უარს მხოლოდ იმიტომ, რომ მიხეილ სააკაშვილმა ასე მოისურვა და მეორე ტურში არგასვლა ამომრჩეველში გაკვირვებას გამოიწვევს.