"[კახა] კალაძე საერთოდ საქმის კურსში არის, რას საუბრობს?" — ასე უპასუხა ნაციონალური მოძრაობის ლიდერმა, ნიკა მელიამ ქართული ოცნების გენერალური მდივნის, კახა კალაძის განცხადებას, რომელიც ხელახალი არჩევნების დანიშვნას ეხებოდა.

"მე ფიქრობ, რომ ბატონი კალაძე არ არის კომპეტენტური ადამიანი, გვესაუბროს. ბატონი კალაძის სიტყვას აქვს ნული ფასი. არ ვაპირებ კალაძის გაკეთებულ კომენტარზე კომენტარი ვაკეთო", — აღნიშნა მელიამ.

პარლამენტის წინ გამართული აქციის პარალელურად ქართული ოცნების გენერალურმა მდივანმა, კახა კალაძემ განაცხადა, რომ მმართველ პარტიაში ხელახალი არჩევნების ჩატარების საკითხი არც განიხილება. მისივე თქმით, აშშ-ს ელჩთან მოლაპარაკებების დროს ოპოზიციამ უარი თქვა ხმების გადათვლაზე და ვიდეოჩანაწერების შემოწმებაზე, რომელიც ე.წ. კარუსელების შესახებ სპეკულაციებს გააქრობდა. მსგავსი შინაარსის განცხადება მმართველი გუნდის წევრმა, მამუკა მდინარაძემაც გააკეთა.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

ამასთან, ოპოზიციის წარმომადგენლების თქმით, ხმების გადათვლას აზრი დაკარგული აქვს, რადგან ცენტრალურ სააარჩევნო კომისიაში ოქმები დაჩქარებით შეაჯამეს და გადაწყვეტილება მიიღეს.

მმართველ პარტიასა და ოპოზიციას შორის დიალოგის დაწყების შუამავლები ამჯერადაც ელჩები აღმოჩნდნენ. შეხვედრები აშშ-ს ელჩის, კელი დეგნანის რეზიდენციაში გაიმართა, რომელსაც ევროკავშირის ელჩი, კარლ ჰარცელიც ესწრება.