ქართული ოცნების გენერალური მდივნისა და თბილისის მერის, კახა კალაძის განცხადებით, აშშ-ს ელჩთან მოლაპარაკებების დროს ოპოზიციამ უარი თქვა როგორც ბიულეტენების გადათვლაზე, ისე საარჩევნო უბნებიდან ვიდეოჩანაწერების ნახვაზე.

როგორც კალაძემ ბრიფინგზე თქვა, შეხვედრის შეთანხმებაა, რომ დიალოგის დეტალებზე არ ისაუბრებდნენ, თუმცა ზოგიერთმა ოპოზიციონერმა რამდენიმე დეტალი მაინც გაამხილა.

"როგორც ჩანს მათი ინტერესი არაა გაირკვეს სიმართლე და ურჩევნიათ მათივე მოდელირებული გაყალბებული არჩევნებით ივაჭრონ. მიუხედავად ამისა, ვიტოვებთ იმედს, რომ მათი რადიკალური და უსაფუძვლო პოზიცია შეიცვლება და დიალოგი ქვეყნისთვის პოზიტიური შედეგებით დასრულდება", — განაცხადა კალაძემ.

კახა კალაძის თქმით, ქართული ოცნება ხელახალი არჩევნების დანიშვნას არ განიხილავს.

აშშ-ს ელჩთან შეხვედრის შემდეგ ლეიბორისტული პარტიის ლიდერმა, შალვა ნათელაშვილმა დაადასტურა, რომ მმართველმა პარტიამ პირველ შეხვედრაზე ხმების გადათვლა შესთავაზა. ოპოზიციის ლიდერები ამბობენ, რომ გადათვლის პროცესს აზრი დაკარგული აქვს, რადგან ცესკოს სხდომაზე ოქმები უკვე შეაჯამეს და გასაჩივრების საშუალებაც არ ეძლევათ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

მმართველ პარტიასა და ოპოზიციას შორის დიალოგის დაწყების შუამავლები ამჯერადაც ელჩები აღმოჩნდნენ. შეხვედრები აშშ-ს ელჩის, კელი დეგნანის რეზიდენციაში გაიმართა, რომელსაც ევროკავშირის ელჩი, კარლ ჰარცელიც ესწრებოდა.