პარლამენტის წინ გამართულ აქციაზე ევროპული საქართველოს ერთ-ერთმა ლიდერმა, გიგი უგულავამ განაცხადა, რომ ოპოზიციის შემდეგი აქცია მეორე ტურის დროს, 21 ნოემბერს გაიმართება.

"უნდა გამოვიდეთ, მეგობრებო, და პროსპექტებზე გავაკეთოთ ჯაჭვი ნიშნად, იმისა, რომ ჩვენ სხვა თანამოქალაქეებს, რომელთაც შეიძლება ჯერ კიდევ ჰგონიათ, რომ იმ სიყალბეში მონაწილეობა მათი მოქალაქეობრივი ვალია, შევახსენოთ და ვუთხრათ, რომ, მეგობრებო, არ მიიღოთ სიყალბეში მონაწილეობა", — განაცხადა უგულავამ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

მმართველ პარტიასა და ოპოზიციას შორის დიალოგის დაწყების შუამავლები ამჯერადაც ელჩები აღმოჩნდნენ. შეხვედრები აშშ-ს ელჩის, კელი დეგნანის რეზიდენციაში გაიმართა, რომელსაც ევროკავშირის ელჩი, კარლ ჰარცელიც ესწრებოდა.