ჯაშუშობასა და აშშ-ის სახელწიფოს საკუთრების მოპარვაში ბრალდებულ ედვარდ სნოუდენს რუსეთმა თავშესაფრის ვადა 2020 წლამდე გაუგრძელა. ინფორმაცია რუსეთის საგარეო საქმეთა სამინისტროს წარმომადგენელმა, მარია ზახაროვამ CNN-ს დაუდასტურა.

სნოუდენი აშშ-ის ეროვნული უსაფრთხოების სააგენტოს ყოფილი კონტრაქტორი იყო. მან თავშესაფრის მიცემის თხოვნით რუსეთს 2013 წელს მიმართა, მას შემდეგ, რაც მედიას აშშ-ის სადაზვერვო და საზედამხედველო ოპერაციების შესახებ მიაწოდა ინფორმაცია.

ობამას საპრეზიდენტო ვადის ამოწურვის ბოლო კვირებში მილიონზე მეტმა ადამიანმა მოაწერა პეტიციას ხელი სნოუდენის შეწყალების თხოვნით. ამასთან, თეთრი სახლის განცხადებით, სნოუდენს არ შეუვსია ოფიციალური დოკუმენტები იმავე თხოვნით.

სამშაბათს, სნოუდენმა ტვიტერის საშუალებით ობამას მადლობა გადაუხადა ჩელსი მენინგისთვის სასჯელის შემსუბუქებისთვის, რომელსაც 750 ათასი დოკუმენტისა და ვიდეოს მოპარვა და ვიკილიქსისთვის გადაცემა ედება ბრალად.