პარლამენტის თავმჯდომარის, არჩილ თალაკვაძის განცხადებით, ისინი მზად არიან, რომ პოლიტიკური დიალოგი პარტიებს შორის მეათე მოწვევის პარლამენტში გაგრძელდეს. ამის შესახებ მან აშშ-ს ელჩის რეზიდენციაში შეხვედრის შემდეგ განაცხადა.

მისი თქმით, დიალოგი არ დასრულებულა და ისინი შემდეგ შეხვედრაზე შეთანხმდნენ.

"ჩვენ არ გვაქვს მოლოდინი, რომ ამ ფორმატში დიალოგი პოლიტიკურ პარტიებში შორის დასრულდება და ამოიწურება, ჩვენ მზად ვართ, რომ ეს დიალოგი განვაგრძოთ საქართველოს მეათე მოწვევის პარლამენტში. ვფიქრობ, ჩვენი საზოგადოებისა და ქვეყნის ინტერესებშია პოლიტიკური სტაბილურობა, უფრო მეტი თანამშრომლობისა და მეტი შესაძლებლობის მოძებნა პარტიებს შორის. ჩვენ მიერ დემოკრატიული რეფორმები, რის მიხედვითაც ჩატარდა არჩევნები, ამის შესაძლებლობას ნამდვილად აძლევს ყველას", — განაცხადა თალაკვაძემ.

დღეს, 14 ნოემბერს ოპოზიციასა და მმართველ გუნდს შორის მოლაპარაკებების მეორე რაუნდი გაიმართა. შეხვედრა კვლავ აშშ-ს ელჩის, კელი დეგნანის რეზიდენციაში ჩატარდა და მას ევროკავშირის ელჩი, კარლ ჰარცელიც დაესწრო. პირველი შეხვედრის მსგავსად, ახლაც მოლაპარაკებებში ბარიერგადალახული ოპოზიციური პარტიის ლიდერები და პარლამენტის თავმჯდომარე, არჩილ თალაკვაძე ჩაერთნენ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე14 ნოემბერსაა დაგეგმილი.

ამავე თემაზე: