ევროპული საქართველოს ლიდერის, დავით ბაქრაძის განცხადებით, დიალოგის პროცესი ცენტრალური საარჩევნო კომისიის მიერ მიღებულმა გადაწყვეტილებამ კიდევ უფრო გაართულა. ამის შესახებ მან აშშ-ს ელჩის რეზიდენაციაში შესვლამდე განაცხადა, სადაც მოლაპარაკებების მეორე რაუნდი უნდა გაიმართოს.

როგორც დავით ბაქრაძე ამბობს, ცესკოს 13 ნოემბრის გადაწყვეტილება მიღებულ იქნა ვადების დაჩქარებით, ოპოზიციისთვის სასამართლოს უფლების წართმევითა და კანონის დარღვევით.

"ეს არის რეალური პასუხი ხელისუფლების მხრიდან აქ მიმდინარე დიალოგზე და სიტუაციის ნორმალიზებისა და დეესკალაციის მცდელობაზე. ამიტომ ისედაც რთული დიალოგის პროცესი კიდევ უფრო გართულდა", — განაცხადა ბაქრაძემ.

მისივე თქმით, ისინი შეხვედრაზე ისინი გამოსავლის მოძებნის განწყობით შედიან.

13 ნოემბერს მას შემდეგ, რაც ოპოზიციის არცერთი საჩივარი არ დააკმაყოფილა, ცესკომ შედეგები შეაჯამა და მეორე ტური დანიშნა, რომელიც 21 ნოემბერს გაიმართება. ცესკოს სხდომამ, რომელზეც ოპოზიციური პარტიების მიერ წარდგენილი საჩივრები განიხილებოდა, ხმაურით ჩაიარა. საბოლოოდ კი, ცესკომ ოპოზიციის არცერთი საჩივარი არ დააკმაყოფილა. ოპოზიციას გასაჩივრებისთვის 1 დღე აქვს.

დღეს, 14 ნოემბერს ოპოზიციასა და მმართველ გუნდს შორის მოლაპარაკებების მეორე რაუნდი იმართება. შეხვედრა კვლავ აშშ-ს ელჩის, კელი დეგნანის რეზიდენციაში მიმდინარეობს და მას ევროკავშირის ელჩი, კარლ ჰარცელიც ესწრება. პირველი შეხვედრის მსგავსად, ახლაც მოლაპარაკებებში ბარიერგადალახული ოპოზიციური პარტიის ლიდერები და ქართული ოცნება ჩაერთვებიან.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე14 ნოემბერსაა დაგეგმილი.