თუ თქვენ გყავთ ძაღლი და უფლებას აძლევთ, ტუჩებზე აგლოკოთ, მაშინ თქვენი ჯანმრთელობა საფრთხის ქვეშ შეიძლება აღმოჩნდეს. ხშირად ძაღლების პატრონებს წარმოდგენა არ აქვთ, რა ძვირად შეიძლება დაუჯდეთ ეს თბილი ჟესტი.

Queen Mary-ის უნივერსიტეტის ვირუსოლოგიისა და ბაქტერიოლოგიის პროფესორი ჯონ ოქსფორდი The Hippocratic Post-თან საუბარში აღნიშნავს, რომ ძაღლებთან ურთიერთობისას ადამიანებმა სიფრთხილე უნდა გამოიჩინონ.

"ძაღლის კოცნა მხოლოდ მისი ნერწყვის გამო არ არის საშიში. ძაღლები დიდ დროს ატარებენ დაბინძურებული ადგილების ქექვაში, რის გამოც მათი დინგი სავსეა ბაქტერიებით, ვირუსებითა და მიკრობებით", - ამბობს ჯონ ოქსფორდი.

BMJ Reports-ში გადმოცემულია ერთი ბრიტანელი ქალის ისტორია, რომელიც სწორედ ამ მიზეზით დაავადდა. ყველაფერი იმით დაიწყო, რომ პაციენტი თავის ტკივილმა შეაწუხა, რის გამოც ექიმებს მიაკითხა. ჰოსპიტალში მისი მდგომარეობა გაუმჯობესდა, თუმცა ოთხი დღის შემდეგ კვლავ დამძიმდა. ქალი კარგავდა კონცენტრაციას, ჰქონდა ძლიერი თავის ტკივილი და მაღალი სიცხე, ამასთან ერთად კი თირკმელების პრობლემაც აღენიშნებოდა. რეანიმაციაში გადაყვანის შემდეგ აღმოჩნდა, რომ სიმპტომების უკან სეფსისი და სისხლის მოწამვლა იდგა.

სისხლის ანალიზებმა აჩვენა, რომ ქალს Capnocytophaga canimorsus-ის ინფექცია ჰქონდა, რომელიც კატებისა თუ ძაღლების პირის ღრუში ჩნდება. პაციენტს ძაღლის ნაკბენი არ აღენიშნებოდა, ამიტომ ექიმებმა დაასკვნეს, რომ აღნიშნული დაავადება მას იტალიური მწევარისგან სწორედ კოცნით ან ლოკვით გადაედო.

აღსანიშნავია ისიც, რომ ქალბატონი სამოცდაათ წელს გადაცილებული იყო, თუმცა არ აღენიშნებოდა იმუნური დისფუნქცია, რაც ექიმების დასკვნის მართებულობას მოწმობს. ძაღლის მეპატრონემ საავადმყოფოში ორი კვირა დაჰყო და ინტენსიური მკურნალობის კურსს გადიოდა.

როგორც აღმოჩნდა, დიდ ბრიტანეთში მსგავსი შემთხვევა ცამეტჯერ დაფიქსირდა. მეცნიერების ვარაუდით, ამერიკაშიც დაახლოებით ამდენივე ქეისი გამოიკვეთა.