აშშ-ს სახმელეთო ჯარების ყოფილი მეთაური ევროპაში ბენ ჰოჯესი აცხადებს, რომ საქართველოში აშშ-ის ინფრასტრუქტურის, კერძოდ კი როტაციული და სხვა ძალების გაზრდა სურს. ჰოჯესი ამის შესახებ Europetime-თან ინტერვიუში ამბობს.

"მსურს, ვიხილო აშშ-ის მიერ საქართველოში ინფრასტრუქტურის გაზრდა, განსაკუთრებით როტაციულისა და საჰაერო სივრცით სტრატეგიული ძალების გადასხმის მხარდაჭერა, ასევე, საზღვაო ძალების ყოფნა. ეს არის დიდი ძალების შეჯიბრის ნაწილი. აჩვენებს, რომ ეს რეგიონი ჩვენთვის მნიშვნელოვანია და ამით ინვესტიციას ჩავდებთ დიპლომატიაში, ინფორმაციაში და კერძო ეკონომიკურ ინვესტიციას, აგრეთვე, უსაფრთხოების სფეროში თანამშრომლობის გაგრძელებაში", — ამბობს ბენ ჰოჯესი.

მან ეს განცხადება მთიან ყარაბაღში სომხეთსა და აზერბაიჯანს შორის მომხდარი ომის შედეგად ძალთა გადანაწილებაზე საუბრისას გააკეთა. მთიანი ყარაბაღის გარშემო განვითარებულ მოვლენების შეფასებისას ის აცხადებს, რომ ყარაბაღში განლაგებული რუსული ჯარები ოკუპანტებს უფრო ჰგვანან, ვიდრე სამშვიდობოებს.

"ვიმედოვნებ, შეთანხმება გაგრძელდება და ორივე მხარე პატივს სცემს შეთანხმებას. მაგრამ, ვფიქრობ, რომ სხვა ქვეყნებსაც შეეძლოთ კრემლის ნაცვლად რეგიონის სამშვიდობო ძალებით უზრუნველყოფა. რუსული ძალები, რომლებიც იქ არიან განლაგდნენ, ოკუპანტებს უფრო ჰგვანან, ვიდრე სამშვიდობოებ. იმის მსგავსი რამ, რაც მათ აქვთ დნესტრისპირეთში, აფხაზეთსა და სამხრეთ ოსეთში. სინამდვილეში ისინი არიან "დანაყოფის მცველები", — აცხადებს ჰოჯესი.

ინტერვიუში ის, ასევე, აღნიშნავს, რომ სომხეთში რუსული ბაზების მნიშვნელობა კიდევ უფრო გაიზარდა და ამიტომ, საქართველომ და მისმა პარტნიორებმა, ისევე, როგორც აშშ-მ, ამას ყურადღება უნდა მიაქციონ.