რუსეთის პრეზიდენტის, ვლადიმერ პუტინის თქმით, რუსეთი ოკუპირებული აფხაზეთისთვის ნომერ პირველ პარტნიორად რჩება. რუსული ტასის ცნობით, პუტინმა აღნიშნა, რომ აფხაზეთის ეკონომიკური ბრუნვის 70% -ზე მეტი რუსეთის ფედერაციაზე მოდის.

"ახლა არის შესაძლებლობა აუჩქარებლად, წყნარ ვითარებაში ვისაუბროთ იმაზე, როგორ ვითარდება ჩვენი ურთიერთობები. სამწუხაროდ, პანდემიას გავლენა აქვს ეკონომიკაზე, თუმცა, რა თქმა უნდა, რუსეთი [აფხაზეთის] ნომერ პირველ პარტნიორად რჩება", — განაცხადა პუტინმა.

მან, ასევე, იმედი გამოთქვა, რომ რუსი ექიმები, რომლებიც ოკუპირებულ აფხაზეთში მუშაობენ, პანდემიის წინააღმდეგ ბრძოლაში მნიშვნელოვან წვლილს შეიტანენ. თავის მხრივ, ბჟანიამ პუტინს გაწეული დახმარებისთვის მადლობა გადაუხადა.

ბჟანია სამუშაო ვიზიტით მოსკოვში ბოლოს 26 სექტემბერს იმყოფებოდა. ის პრეზიდენტის ადმინისტრაციასა და რუსეთის ფედერაციის მთავრობის წევრებს შეხვდა. სხვა დამატებით დეტალზე ინფორმაცია არ გავრცელებულა.