სომხეთის მესამე პრეზიდენტი, სერჟ სარგსიანი ნაციონალური უსაფრთხოების სამსახურში გამოკითხვაზე დაიბარეს. ინფორმაციას ამის შესახებ სომხური მედია ავრცელებს.

ამასთან, გავრცელდა ინფორმაცია, რომ დღეს აქციაზე დააკავეს ოპოზიციური პარტიის, აყვავებული სომხეთის ლიდერი, გაგიკ წარუკინიანი.

ერევანში პრემიერმინისტრის, ნიკოლ ფაშინიანის გადადგომის მოთხოვნით, საპროტესტო აქცია მიმდინარეობს. დემონსტრანტებმა გადადგომისთვის პრემიერს ვადა შუაღამემდე მისცეს. მოქალაქეების პროტესტი ყარაბაღზე ფაშინიანის მიერ გაფორმებულმა ხელშეკრულებამ გამოიწვია. მიტინგის ორგანიზატორები პრემიერს "მიწების ჩაბარებაში" ადანაშაულებენ.

9 ნოემბერს გვიან ღამით სომხეთმა და აზერბაიჯანმა მთიან ყარაბაღში ომის დასრულების შესახებ შეთანხმებას ხელი მოაწერეს. სომხეთში შეთანხმება კაპიტულაციად აღიქვეს, რასაც მოსახლეობის პროტესტი მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. მას ოპერაცია ჩაუტარდა. ერევნისგან განსხვავებით, ბაქოში შეთანხმებას სიხარულით შეხვდნენ.

სამმხრივ დოკუმენტს ხელი სომხეთის პრემიერმინისტრმა, ნიკოლ ფაშინიანმა, აზერბაიჯანის პრეზიდენტმა, ილჰამ ალიავმა და რუსეთის პრეზიდენტმა ვლადიმერ პუტინმა მოაწერეს ხელი. შეთანხმების თანახმად, სომხური მხარე აზერბაიჯანს კონფლიქტის ზონაში რამდენიმე ტერიტორიას გადასცემს, მთიან ყარაბაღში ბრუნდებიან დევნილები, კონფლიქტის ხაზის გასწვრივ კი რუსი სამშვიდობოები განლაგდებიან. რა სტატუსი ექნება მთიანი ყარაბაღის რეგიონს, შეთანხმებაში არ წერია.

ილჰამ ალიევი ამბობს, რომ რუსი სამხედროების გარდა ზონაში თურქი მშვიდობისმყოფელებიც იქნებიან. მან შეთანხმებას ისტორიული უწოდა და აღნიშნა, რომ ეს სომხეთის კაპიტულაციას ნიშნავს.

ფაშინიანი კი აღნიშნავს, რომ შეთანხმების ხელმოწერის გარდა, სხვა გზა არ ჰქონდა. როგორც ის განმარტავს, გადაწყვეტილება ანალიზის შედეგად მიიღეს.

ამავე თემაზე: