რუსეთის პრეზიდენტი, ვლადიმერ პუტინი ხვალ, 12 ნოემბერს ოკუპირებული აფხაზეთის დე ფაქტო პრეზიდენტს, ასლან ბჟანის მიიღებს. შეხვედრა სოჭშია დანიშნული.

დე ფაქტო პრეზიდენტის პრესსამსახურის ცნობით, ბჟანია რუსეთის ფედერაციაში პუტინის მიწვევით ჩავა. მათივე ინფორმაციით, დაგეგმილია საუბრები ორმხრივი თანამშრომლობის ფარგლებში სავაჭრო, ეკონომიკური, კულტურული და ჰუმანიტარული თანამშრომლობის მდგომარეობასა და პერსპექტივებზე. პრესსამსახურში, ასევე, ამბობენ, რომ საუბარი იქნება 2014 წლის 24 ნოემბერს რუსეთის ფედერაციასა და ოკუპირებულ აფხაზეთს შორის ალიანსისა და სტრატეგიული პარტნიორობის ხელშეკრულების შესრულების პროცესში მიღწეულ პროგრესზე. აგრეთვე, საგარეო პოლიტიკის კოორდინაციისა და ურთიერთთანამშრომლობის საკითხებზე რეგიონალური უსაფრთხოების უზრუნველყოფაში.

ბჟანია სამუშაო ვიზიტით მოსკოვში ბოლოს 26 სექტემბერს იმყოფებოდა. ის პრეზიდენტის ადმინისტრაციასა და რუსეთის ფედერაციის მთავრობის წევრებს შეხვდა. სხვა დამატებით დეტალზე ინფორმაცია არ გავრცელებულა.