მრავალი მაყურებელი იტოვებდა იმედს, რომ ეკრანებზე კვლავ იხილავდა საყვარელი სერიალის გაქცევა (Prison Break) გაგრძელებას, თუმცა შოუს მთავარ ვარსკვლავს, უენტუორთ მილერს აღარ აქვს სურვილი, რომ მაიკლ სკოფილდის როლი კვლავ მოირგოს.

მსახიობმა 9 ნოემბერს ინსტაგრამის პირად გვერდზე გამოქვეყნებული მიმართვით დააანონსა, რომ ამ ცნობილ სერიალში მონაწილეობას აღარ მიიღებს და ამ გადაწყვეტილების მიზეზებზეც ისაუბრა:

"ოფიციალურად გამოვეთიშე გაქცევას. აღარ მინდა ჰეტეროსექსუალი პერსონაჟები განვასახიერო. მათი ისტორიები მრავალჯერაა მოთხრობილი უკვე. შესაბამისად, მაიკლს ეკრანზე ვეღარ იხილავთ. თუ შოუს ფანი იყავით და ახალ სეზონებს ელოდით, მესმის თქვენი იმედგაცრუება და ვწუხვარ", — ვკითხულობთ მილერის განცხადებაში.

მსახიობმა ამავე განცხადების დასაწყისში სოციალურ ქსელებში სიძულვილის ენის პრობლემატურობაზე ისაუბრა, რაც განსაკუთრებულ საფრთხეს იმ მოზარდებს უქმნის, რომლებიც საკუთარი იდენტობის გარკვევას იწყებენ.

"საკუთარ თავზე არ ვდარდობ. ამ სივრცეში მე ვერ დამამცირებთ, რადგან მეტისმეტი ძალაუფლება მაქვს: "წაშალე. დაბლოკე. გააუქმე". მაგრამ სერიოზულ პასუხისმგებლობას ვიღებ ქვიარ ბავშვებზე, რომლებიც ჩემს გვერდს სტუმრობენ და არ მინდა, იდიოტობების კითხვა მოუწიოთ", — წერს მილერი.

უენტუორთ მილერის განცხადებას მსახიობი სარა უეინ კელისი გამოეხმაურა, რომელიც ამავე სერიალში მაიკლ სკოფილდის ცოლს — სარას განასახიერებს.

"საერთო საქმის პატივისცემითა და დიდი სიყვარულით მხარს ვუჭერ მის არჩევანს. ყველა ფანმა უნდა იცოდეს, რომ გაქცევის სამსახიობო გუნდი ქვიარ ადამიანებისთვის მეგობრული გარემოა. ჩვენი LGBTQ+ თემის წევრ მეგობრებთან და ოჯახის წევრებთან ერთად ვუჭერთ მხარს მათ შემოქმედებით საქმიანობას და უფლებებისთვის ბრძოლისას გვერდში ვუდგავართ. ყოველთვის", — ამბობს სარა უეინ კელისი.

გაქცევის პრემიერა 2005 წელს შედგა და მალევე მილიონობით მაყურებლის გული მოიგო მთელ მსოფლიოში. სერიალი მეოთხე სეზონით 2009 წელს დასრულდა, თუმცა 8 წლის შემდეგ ახალი, მეხუთე სეზონიც გადაიღეს და ბოლო პერიოდში ასევე ვრცელდებოდა სხვადასხვა ინფორმაცია, რომ შოუს გაგრძელება ისევ იგეგემება: მაგალითად, დომინიკ პარსელმა სექტემბერში ინსტაგრამზე გამოაქვეყნა პოსტი, სადაც წერდა, რომ სერიალის მეექვსე სეზონის გადაღებები იწყებოდა, თუმცა ამჟამად ეს პოსტი მისი გვერდიდან წაშლილია.

სავარაუდოდ, შემდეგ სეზონებს ვეღარ ვიხილავთ ან თუ მაინც გადაიღებენ ისტორიის გაგრძელებას, ეს უენტუორთ მილერის გარეშე მოხდება.