პარლამენტის ეზოში მობილიზებული სამართალდამცავები ტერიტორიას ტოვებენ. როგორც On.ge-ს ჟურნალისტი ადგილიდან გვიყვება, ათეულობით სამართალდამცავმა პარლამენტთან მობილიზებული ავტობუსებით მიმდებარე ტერიტორია უკვე დატოვა.

მათი ავტობუსებით გადაყვანის შემდეგ კი, ეზოდან პოლიციის რამდენიმე მანქანაც გამოვიდა, სადაც სამართალდამცავები ისხდნენ. ჩვენი ჟურნალისტის თქმითვე, ამ წუთებში პარლამენტის ეზო მობილიზებული სამართალდამცავებისგან დაიცალა, თუმცა სხვები პარლამენტის წინ რჩებიან და აქცია გრძელდება.

დღეს მოძრაობა სირცხვილიას აქცია პარლამენტთან 22:00 საათიდან მიმდინარეობს. ეს აქცია გადაადგილების შეზღუდვის ამოქმედებასთან ერთად დაიწყო. აქტივისტების განცხადებით, დღეს ისინი ამ შეზღუდვებს "დაუმორჩილებლობას" უცხადებენ.

საკოორდინაციო საბჭოს გადაწყვეტილებით, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდა. შეზღუდვა ვრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.