სომხეთში 17 პოლიტიკური პარტია, პრემირმინისტრ ნიკოლ ფაშინიანის მთავრობის გადადგომას ითხოვს. მათი თქმით, აუცილებელია, რომ დაუყოვნებლივ შეიქმნას ახალი აღმასრულებელი ორგანო, რომელიც ქვეყანაში სიტუაციის კონტროლსა და სამხედრო-პოლიტიკური პრობლემების მოგვარებას შეძლებს.

პარტიების განცხადებით, ქვეყანაში მიმდინარე ომის პერიოდში ხელისუფლების მიერ გადადგმული ნაბიჯები ხალხის უსაფრთხოებას ვერ უზრუნველყოფს და უუნაროა. მათი თქმით, ხელისუფლებამ აჩვენა, რომ არ შეუძლია გაუმკლავდეს შიდა და გარე გამოწვევებს.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

რუსეთის შუამავლობით, სომხეთი და აზერბაიჯანი ჰუმანიტარული მიზნით ცეცხლის შეწყვეტაზე ორჯერ შეთანხმდნენ, თუმცა ზავი ორივეჯერ მალევე დაირღვა. ბაქომ და ერევანმა ცეცხლის შეწყვეტაში ისევ ერთმანეთი დაადანაშაულეს.

DW.com-ის ინფორმაციით, ყარაბაღის კონფლიქტისას სომხეთის მხრიდან 974 სამხედრო და 37 მშვიდობიანი მოქალაქე დაიღუპა. აზერბაიჯანის მხრიდან დაღუპული სამხედროების ზუსტი რიცხვი უცნობია, თუმცა ბაქო აცხადებს, რომ მათი მხრიდან 56 მშვიდობიანი მოქალაქე დაიღუპა, 300-ზე მეტი კი დაშავდა.