ევროპული საქართველოს ერთ-ერთი ლიდერი, გიგი უგულავა ამბობს, რომ დღეს გადაადგილების შეზღუდვას არ დაემორჩილებიან. გარდა ამისა, მან მოუწოდა რუსთაველის გამზირზე შეკრებილებს, რომ გადაწყვეტილება ინდივიდუალურად მიიღონ.

"მე პირადად, ისევე, როგორც სხვა პოლიტიკური ლიდერი აქ დავრჩებით იმის სადემონსტრაციოდ, რომ არ მივიღებთ ამ თავსმოხვეულ კომენდანტის საათს. ამ საბჭოთა გადმონაშთს, რომელიც ბოლოს მოვისმინეთ 1989 წლის 9 აპრილის შემდეგ. ეს სიტყვა შეურაცხმყოფელია. რა კომენდანტის საათზე საუბრობს? 9 საათზე კორონა არ არის და 10 საათზე კორონა არის?" — განაცხადა უგულავამ აქციაზე სიტყვით გამოსვლის დროს.

ნაციონალური მოძრაობის მაჟორიტარობის კანდიდატი წყალტუბო-სამტრედიაში, ნანუკა ჟორჟოლიანი ამბობს, ისინი დაუმორჩილებლობას აცხადებენ. გარდა ამისა, აქციაზე დარჩენას აპირებს პარტიის ლიდერი, ნიკა მელიაც.

პარლამენტთან ოპოზიციის მიერ ორგანიზებული აქცია ამ დრომდე მიმდინარეობს. 22:00 საათზე კი მოძრაობა #სირცხვილია გამართავს კიდევ ერთ აქციას, სახელწოდებით დაუმორჩილებლობა. დღეს, ღამის ათი საათიდან ძალაში შედის მთავრობის ახალი რეგულაცია, რომელიც 22:00 საათიდან 05:00 საათამდე გადაადგილების შეზღუდვას ითვალისწინებს. დარღვევისთვის ჯარიმა 2 000 ლარია. აქცია სწორედ დროის ამ პერიოდშია დაგეგმილი.

ამავე თემაზე: