არაბთა გაერთიანებულ საამიროებში ე.წ. ღირსების მკვლელობისთვის ლმობიერი სასჯელი შეიცვალა. ასევე გაუქმდა კანონი, რომელიც ქორწინების გარეშე წყვილების ერთად ცხოვრებას კრძალავდა და ლეგალიზდა ალკოჰოლის მიღება.

ასევე, სახელმწიფოში მცხოვრებ უცხოელებს შეეძლებათ ისარგებლონ საკუთარი ქვეყნის კანონებით განქორწინებისას და მემკვიდრეობის გადაცემის დროს. ისინი ვალდებულები აღარ იქნებიან დაიცვან არაბთა გაერთიანებული საამიროების კანონმდებლობა, რომელიც ისლამურ რელიგიურ კანონს ემყარება.

ქვეყანა, რომელშიც მიგრანტები მოქალაქეების 9-დან ერთზე მეტს შეადგენენ, უკვე დიდი ხანია თავს საერთაშორისო მასშტაბით თანამედროვე ბიზნესისა და ტურისტული დანიშნულების ადგილად აფასებს და საკუთარ კანონმდებლობას ყოველთვის მკაცრად არ იცავს. შემწყნარებელი მიდგომის არქონის გამო, საამიროების რეპუტაცია საზღვარგარეთის ქვეყნებში შერყეულია. მაგალითად ქვეყანაში მოქმედებს კანონი, რომელიც გაუპატიურების მსხვერპლი ქალის დაპატიმრებას ითვალისწინებს.

ახალი რეფორმების მიზანია "არაბთა გაერთიანებული საამიროების ტოლერანტობის პრინციპების გამყარება". ის პირველ რიში სახლში მყოფებისთვის ცვლის ნორმებს. საამიროები მომავალ წელს მსოფლიო ექსპოზიციის მასპინძელი ქვეყანაა და ცვლილებები, სავარაუდოდ, ამას უკავშირდება. კორონავირუსის გამო ერთი წლით დაგვიანებულ შეკრებაზე 25 მილიონ ვიზიტორს ელიან.

"ბედნიერი ვარ ახალი პროგრესული კანონების გამო. 2020 წელი მკაცრი და ტრანსფორმაციული წელი იყო არაბთა გაერთიანებული საამიროებისათვის", — განუცხადა Associated Press- ს ადგილობრივმა რეჟისორმა აბდალა ალ კააბიმ. მისი შემოქმედება ხელოვნებაში ისეთ ტაბუდადებულ თემებს ეხმიანება, როგორიცაა ჰომოსექსუალური სიყვარული და გენდერული იდენტობა.

ამ დრომდე, საამიროებში მოსამართლეებს შეეძლოთ მსუბუქი განაჩენების გამოეცხადებინათ, როცა ქალს ნათესავი ესხმოდა თავს ან კლავდა და ეს დანაშაული ე.წ. ღირსების მკვლელობით და ოჯახის რეპუტაციის გადარჩენით მართლდებოდა. ასეთი დანაშაულების მიზეზად ქალის არანათესავ კაცთან მეგობრობა, ურთიერთობა ან მასთან ერთად გაქცევა ფასდებოდა.

Human Rights Watch-ის აღმასრულებელმა დირექტორმა, კენეტ როთმა, ცვლილებებს ქალთა უფლებებისთვის წინგადადგმული ნაბიჯი უწოდა, თუმცა შეშფოთება გამოხატა დუბაის მმართველის, მოჰამედ ბინ რაშიდ ალ მაკტუმის შვილებთან დაკავშირებით. დიდი ბრიტანეთის განცხადებით, მისი შვილები ბრიტანეთიდან გაიტაცეს, მათ შორის ერთ-ერთი კემბრიჯის ქუჩებიდან. სასამართლოს მიხედვით, ორი ქალის გატაცება სწორედ ალ მაკტუმის მიერ იყო ორგანიზებული და ახლა მის შვილებს თავისუფლება ეზღუდებათ.

საამიროების ახალი კანონი ასევე ითვალისწინებს გამკაცრებულ სასჯელს იმ კაცებზე, რომლებიც ქალებს ნებისმიერი სახით ავიწროებენ. თუმცა, ცვლილებებში არ ასახულა ისეთი შეზღუდვების დეკრიმინალიზაცია, როგორიცაა ჰომოსექსუალური ურთიერთობები, საჯაროდ სიყვარულის გამოხატვა ან თავისუფალი ჩაცმის სტილის არსებობა.

მიუხედავად იმისა, რომ საამიროების ქალაქების რესტორნებსა და ბარებში ალკოჰოლი იყიდება, ფიზიკურ პირებს მათ შესაძენად ან სახლში შესანახად ლიცენზია სჭირდებოდათ. ახალი კანონი მუსლიმებს, რომლებიც აღნიშნულ ნებართვას ვერ იღებდნენ, ალკოჰოლის თავისუფლად მიღების ნებას რთავს.