ცენტრალური საარჩევნო კომისიის განცხადებით, რამდენიმე სასამართლო გადაწყვეტილების შედეგად, საოლქო-საარჩევნო კომისიებს დაევალათ, 15 საარჩევნო უბნის შედეგების გადათვლა, რაც დღეს და ხვალ განხორციელდება. ამის შესახებ მათ ბრიფინგზე განაცხადეს და მოუწოდეს ჩართულ პირებს, მონაწილეობა მიიღონ ხმის გადათვლის პროცესში.

ამ წუთებში კი ცეკსოსთან ოპოზიცია მსვლელობით მიემართება და გეგმა აქვს, მათ "კომენდანტის საათი" დაუწესონ. ნიკა მელიას თქმით, ცესკოსთან დარჩებიან და შენობაში ვერავინ შევა და ვერავინ გამოვა.

ოპოზიციურ პარტიებს სამი მოთხოვნა ჰქონდათ და ხელისუფლებას დრო რვა საათამდე მისცეს. ესენია:

  1. ხელახალი, თავისუფალი და სამართლიან არჩევნები;
  2. თამარ ჟვანია უნდა გადადგეს და კომისიები უნდა დაკომპლექდეს სამართლიანი წესით;
  3. ყველა პოლიტპატიმარი უნდა იყოს გამოშვებული.

მათ პასუხად მმართველ გუნდში განაცხადეს, რომ მოთხოვნები აბსურდულია და სერიოზულად არ აღიქვამენ.

ამ წუთებში ოპოზიცია პარლამენტიდან ცესკოსკენ დაიძრა. მანამდე, 5 საათის განმავლობაში პარლამენტის წინ წარსულში ერთმანეთთან დაპირისპირებული ოპოზიციური პარტიები საერთო აქციას მართავდნენ და არჩევნების შედეგებს აპროტესტებდნენ.

ოპოზიციური პარტიები არჩევნების შედეგებს არ აღიარებენ და არალეგიტიმურად ცნობენ. ყველა ბარიერგადალახულმა პარტიამ უარი თქვა მეორე ტურში მონაწილეობასა და პარტლამენტის მანდატებზე.

არჩევნების შემდეგ, როცა ოპოზიციამ აქციები დააანონსა, სამთავრობო გუნდი და საკოორდინაციო საბჭოს წევრები უფრო მკაცრად აცხადებენ, რომ აქციები ვირუსის გავრცელების საფრთხეს შეიცავს და მოუწოდებენ მოქალაქეებსა და პოლიტიკურ ლიდერებს დაიცვან წესები.