ეროვნულ-დემოკრატიული ინსტიტუტის (NDI) მიერ ჩატარებული საზოგადოებრივი აზრის კვლევის შედეგების მიხედვით, ნატოში ქვეყნის გაწევრიანებას, ყველაზე მეტად მხარს ქუთაისში უჭერენ.

კერძოდ. თბილისის მოსახლეობის მხოლოდ 63 პროცენტი უჭერს მხარს საქართველოს ნატოში გაწევრიანებას, ბათუმში - 63 პროცენტი, ზუგდიდში - 54 პროცენტი, ახალციხეში - 64 პროცენტი, ხოლო ქუთაისში ეს მაჩვენებელი ყველაზე მაღალია - 67 პროცენტი. რაც შეეხება საერთო ეროვნულ მაჩვენებელს, მოსახლეობის მხოლოდ 61 პროცენტისთვისაა მისაღები საქართველოს მთავრობის გაცხადებული მიზანი, საქართველო გახდეს ნატოს წევრი. ყველაზე ნაკლებად ნატოში გაწევრიანება ეთნიკურ უმცირესობათა დასახლებებს სურს - მათი მაჩვენებელი 39 პროცენტია.

2012 წლიდან დღემდე, 10 პროცენტიდან 25 პროცენტამდე გაიზარდა იმ ადამიანთა რაოდენობა, რომლებისთვისაც ნატოში გაწევრიანება მიუღებელია

NDI

მიუხედავად იმისა, რომ NDI-ის გამოკითხვის მიხედვით ნატოში გაწევრიანება მოსახლეობის უმრავლესობას სურს, რამდენიმე წელია ამ იდეის მომხრეთა რაოდენობა იკლებს. 2013 წელს ჩატარებული კვლევის მიხედვით, ამ სამხედრო ალიანსში გაწევრიანებას მოსახლეობის 80-პროცენტიანი მხარდაჭერა ჰქონდა, რაც 2017 წლისთვის 61 პროცენტამდეა შემცირებული. პარალელურად, 2012 წლიდან დღემდე, 10 პროცენტიდან 25 პროცენტამდე გაიზარდა იმ ადამიანთა რაოდენობა, რომლებისთვისაც ნატოში გაწევრიანება მიუღებელია.

დღეს, 16 იანვარს, ეროვნულ-დემოკრატიულმა ინსტიტუტმა (NDI) და CRRC–საქართველომ 2016 წლის ნოემბერ-დეკემბერში ჩატარებული საზოგადოებრივი აზრის კვლევის შედეგების პირველი ნაწილი წარადგინა.

კვლევის საველე სამუშაოები ჩატარდა 4 ნოემბერი - 4 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით), 3,141 პირისპირ ინტერვიუს წარმომადგენლობითი შერჩევის საფუძველზე.