აჭარის პოლიციის დეპარტამენტის უფროსის, კოტე ანანიაშვილის თქმით, ბათუმში საოლქო საარჩევნო კომისიასთან მიმდინარე აქციის დროს სხეულის დაზიანება სამმა ადამიანმა მიიღო. ამის შესახებ მან ტელეკომპანია იმედის ეთერში განაცხადა.

"მათ შორის, ერთი ჟურნალისტია, ერთი შინაგან საქმეთა სამინისტროს ოპერატორი და ერთი ერთ-ერთი ოპოზიციური პარტიის წარმომადგენელი. რაც შეეხება ფაქტს, საოლქო კომისიის მიმდებარე ტერიტორიაზე შსს-ს საპოლიციო ძალები იცავდნენ საზოგადოებრივ წესრიგს, გარკვეული ოპოზიციური პარტიის წარმომადგენლები და მოქალაქეთა ჯგუფები ცდილობდნენ შეეღწიათ საოლქო კომისიაში. აღნიშნული ინციდენტის დროს ჩაიმსხვრა მინის კონსტრუქცია, რა დროსაც დაზიანება მიიღეს მოქალაქეებმა", — განაცხადა მან.

საოლქო საარჩევნო კომისიებთან, სადაც ამ წუთებში საჩივრებსა და ოქმებს განიხილავენ, ქვეყნის მასშტაბით აქციები მიმდინარეობს, ადგილზე მობილიზებულია პოლიციაც.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%;

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.