ევროპული საქართველოს ერთ-ერთი ლიდერი, ელენე ხოშტარია აცხადებს, რომ ვაკის ოლქში 3 989 ბიულეტენია გაბათილებული. ამაზე მან სპეციალურ ბრიფინგზე ისაუბრა, სადაც ხოშტარიამ ამ ოლქში აღმოჩენილი დარღვევების შესახებ პრეზენტაცია გამართა.

ხოშტარიას განცხადებით, მათ რამდენიმე დარღვევა აღმოაჩინეს, მათ შორის, გაყალბებული ხელმოწერა შესწორების ოქმზე. მისი თქმით, მათი ორი წარმომადგენლის ხელმოწერა ფიქსირდება უბანზე, სადაც ისინი ფიზიკურად არ იმყოფებოდნენ.

"მას შემდეგ, რაც ისინი დაუკავშირდნენ და უთხრეს, რომ ფიზიკურად იქ არ იყვნენ და მათი ხელმოწერა იქ რატომ არის, პასუხი მიიღეს, რომ არ შეაწუხეს და მათ მაგივრად მოაწერეს ხელი. ეს არის სისხლის სამართლის დარღვევა", — ამბობს ხოშტარია.

ელენე ხოშტარიამ სხვა დარღვევებზეც ისაუბრა. მისი თქმით:

  • მაჟორიტარულ ნაწილში დაუბალანსებელია უბნების 76%; (პროპორციული — 31 უბანი; მაჟორიტარული — 62 უბანი);
  • 299 ბიულეტენი არის გამქრალი; ხოშტარიას განცხადებით, ეს არის საფუძვლიანი ეჭვი ე.წ. სომხური კარუსელისა.
  • 5 უბანზე ბიულეტენები ამომრჩეველზე მეტია;
  • კარუსელი შემთხვევა, კერძოდ, ხოშტარიას თქმით, კონკრეტული პირი ხმის მისაცემად მივიდა ჯერ მთაწმინდის ოლქში, შემდეგ ვაკის ოლქში;
  • გაყალბებული ოქმი, რომელსაც ბეჭედი აქვს დარტყმული და შემდეგ ხელით გაკეთებული აქვს ჩასწორება;
  • მანიპულაციური ოქმები, სადაც, ელენე ხოშტარიას თქმით, არ არის X-ები დასმული;
  • ამასთან, პრეზენტაციაზე ელენე ხოშტარიამ წარმოადგინა ვიდეო, სადაც ჩანს, რომ გადასატანი ყუთი გადამალული.

31 ოქტომბრის არჩევნების ცესკოს გამოცხადებულ შედეგებს ოპოზიცია არ აღიარებს. პარტიებმა საკანონმდებლო ორგანოში შესვლაზე უარი უკვე თქვეს. პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა.