ქართული ოცნების აღმასრულებელი მდივნის, ირაკლი კობახიძის განცხადებით, ოპოზიციის აქციაზე რუსთაველის გამზირზე 20 კაცი იყო შეკრებილი. მისივე თქმით, 20 კაცის შეკრება ნაციონალურ მოძრაობას არ უჭირს, რადგან მანამდე 200-ს კრებდნენ.

"ამასობაში მეგობრებმა მითხრეს, რომ სანამ კითხვა დასვით, აქცია დაშლილა და მანამდე 20 კაცი იყო შეკრებილი. 20 პროტესტანტის შეკრება ნაც. მოძრაობას არ უჭირს, მანამდე 200-ს კრებდნენ, ახლა 20 კაცზე არიან ჩამოსულნი", — განაცხადა კობახიძემ.

ცესკოს გამოცხადებულ 31 ოქტომბრის არჩევნების შედეგებს ოპოზიცია არ აღიარებს. პარტიებმა საკანონმდებლო ორგანოში შესვლაზე უარი უკვე განაცხადეს.

საპარლამენტო არჩევნები საქართველოში 31 ოქტომბერს ჩატარდა. პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა.

ეუთოს დემოკრატიული ინსტიტუტებისა და ადამიანის უფლებების ოფისის (ოდირის) და ეუთოს, ევროპის საბჭოს და ნატოს საპარლამენტო ასამბლეათა საერთაშორისო დამკვირვებლების წინასწარი მიგნებებისა და დასკვნების შესახებ ერთობლივი მოხსენების თანახმად, არჩევნები კონკურენტულ გარემოში ჩატარდა და საერთო ჯამში, ფუნდამენტური თავისუფლებები დაცული იყო. თუმცა, მათვე თქმით, დაფიქსირდა დარღვევებიც.