პარლამენტის თავმჯდომარის, არჩილ თალაკვაძის განცხადებით, თუ ოპოზიცია პარლამენტში არ შევა, მაშინ ხალხის განწყობას დააკვირდებიან და ოპოზიციურ პარტიების დაფინანსებაზე შესაბამისად იმსჯელებენ.

"ეს არის ხალხის ფული და რა თქმა უნდა, დავაკვირდებით, თუ რა იქნება საზოგადოების დაკვეთა ამასთან დაკავშირებით. საზოგადოებამ იცის, რომ მათი გადასახადები უნდა დაიხარჯოს იმაში, რომ ოპოზიციურმა პარტიებმა იმუშაონ პარლამენტში, გაუწიონ ოპონირება და ზედამხედველობა როგორც მმართველ გუნდს, ასევე, მთავრობას", — განაცხადა არჩილ თალაკვაძემ.

საქართველოში საპარლამენტო არჩევნები 31 ოქტომბერს ჩატარდა. არჩევნების შედეგების ლეგიტიმურობას უარყოფს ბარიერგადალახული რვავე ოპოზიციური პარტია და 1 ნოემბრიდან, ყოველდღიურად აქციებს მართავს. ოპოზიციური პარტიები პარლამენტში შესვლაზე უარს აცხადებენ და რიგგარეშე არჩევნებს ითხოვენ.