პარტია ჩვენი საქართველო — სოლიდარობის ალიანსი ცენტრალური საარჩევნო კომისიის თავმჯდომარის, თამარ ჟვანიას პასუხისმგებლობის დაყენებასა და რიგგარეშე არჩევნების ჩატარებას ითხოვს.

"ცხადია, რომ არჩევნები გაყალბდა არამხოლოდ ხმების დათვლის პროცესში, არამედ წინასაარჩევნო პერიოდშიც. ადგილი ჰქონდა, როგორც ადამიანების სიღარიბით მანიპულირებისა და მოსყიდვის უამრავ ფაქტს, ისე საჯარო მოხელეების დაშინებით, სხვა ადამიანების დაშინების ფაქტებს. მიუხედავად ამისა, ქართულმა ოცნებამ გადალახა წითელი ხაზები და არჩევნების გაყალბება დაგვირგვინდა სწორედ კომისიებში ხმის დათვლის პროცედურის მანიპულირების საფუძველზე", — განაცხადა პარტიის ერთ-ერთმა ლიდერმა, ბექა ნაცვლიშვილმა.

ნაცვლიშვილის განცხადებით, მათი კიდევ ერთი მოთხოვნაა საარჩევნო კანონმდებლობისა და სისტემის ცვლილება, ვინაიდან ყველა პარტიას ჰქონდეს თანაბარი წვდომა კომისიაში და მედიაში. მისი თქმით, ასე უკეთ გაკონტროლდება პროცედურები.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება. ასევე, აცხადებენ, რომ გაყალბებას ცესკოს თავმჯდომარეც უწყობდა.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%;

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.