ქართული ოცნების გენერალური მდივანი, კახა კალაძეს ეგონა, რომ მმართველი პარტია უფრო მეტ ხმას მიიღებდა პროპორციულ არჩევნებში და მაჟორიტარულ ოლქებშიც პირველივე ტურში გაიმარჯვებდა. ამის შესახებ კალაძემ გადაცემა იმედის კვირაში ისაუბრა.

"ძალიან ბევრი ადამიანი იყო მოსული არჩევნებზე, შედარებით 2016 წელთან და ამის გამო მივიღეთ 48%. მე გეტყვით ჩემს დამოკიდებულებას გულწრფელად, მე მეგონა, რომ უფრო მეტს მივიღებდით პროცენტულ მაჩვენებელს. მეგონა, ასევე, რომ ამდენი მეორე ტური არ დაგვჭირდებოდა, თუმცა აქ საგანგაშო არაფერი არ არის. ესეც დემოკრატიული პროცესების ნაწილია", — განაცხადა კახა კალაძემ.

მისი თქმით, ქართულ ოცნებას უკვე დაწყებული აქვს მზადება მეორე ტურისთვის. კალაძე დარწმუნებულია, რომ მმართველი პარტია ყველა მაჟორიტარულ ოლქში გაიმარჯვებს.

ცენტრალურმა საარჩევნო კომისიამ საარჩევნო უბნების 100% დათვალა, რომლის მიხედვითაც ქართულმა ოცნებამ 48,15% მიიღო. ამავე მონაცემებით, რამდენიმე მაჟორიტარულ ოლქში მეორე ტური გაიმართება.

გაიგეთ მეტი: