ევროპარლამენტარი, ვიოლა ფონ კრამონი საპარლამენტო არჩევნების დროს არათანაბარ ფინანსურ რესურსებზე წვდომაზე საუბრობს. კრამონის თქმით, დასანანია, რომ ამომრჩევლებზე ზეწოლის შემთხვევები ისევ ფიქსირდება.

"ყურადღებით ვაკვირდები საქართველოს პარლამენტის არჩევნებს. მიუხედავად იმისა, რომ, ზოგადად, არჩევნები თავისუფალ გარემოში ჩატარდა, დასანანია, რომ ამომრჩევლებზე ზეწოლის შემთხვევებს ვხედავთ. არათანაბარ ადმინისტრაციულ რესურსებზე წვდომა, კერძოდ, ფინანსურ რესურსებზე წვდომა დემოკრატიას ძირს უთხრის. მხარეებმა სიმშვიდე უნდა შეინარჩუნონ", — წერს ევროპარლამენტარი ტვიტერზე.

ამ წუთებში ოპოზიცია საპროტესტო აქციას მართავს. ცესკოს გამოცხადებულ შედეგებს შედეგებს ოპოზიცია არ აღიარებს. პარტიების ნაწილი ამბობს, რომ სადეპუტატო მანდატებზე უარს იტყვიან, რათა რიგგარეშე არჩევნები ჩატარდეს.

საპარლამენტო არჩევნები საქართველოში გუშინ, 31 ოქტომბერს ჩატარდა. პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა.