საქართველოს პრეზიდენტის განცხადებით, 31 ოქტომბერს ქართულმა საზოგადოებამ "დაამარცხა ნიჰილიზმი და საკუთარ თავს დაუმტკიცა, რომ პოსტსაბჭოთა ეპოქა საქართველოში სრულდება!". ასე გამოეხმაურა საპარლამენტო არჩევნებს პრეზიდენტი. სალომე ზურაბიშვილი სპეციალურ განცხადებაში ასევე აღნიშნავს, რომ ქვეყანამ შეძლო და ჩაატარა მშვიდობიანი, სამართლიანი, უსაფრთხო, დემოკრატიული და "შეიძლება ითქვას, რომ ევროპული არჩევნები".

"მიუხედავად ურთულესი და უპრეცედენტო გამოწვევებისა, გუშინდელმა საპარლამენტო არჩევნებმა მსოფლიოს კიდევ ერთხელ აჩვენა, რომ ჩვენი ქვეყანა დემოკრატიულობის და განვითარების გზაზე შეუფერხებელ სვლას აგრძელებს.

ჩვენ შევძელით, არჩევნების მშვიდ გარემოში ჩატარება, ამომრჩეველთა მაღალი აქტივობის მაჩვენებლით და მძიმე დარღვევების გარეშე. თითოეულ ამომრჩეველს, პოლიტიკური ნიშნის მიუხედავად, ამისთვის მინდა ვუთხრა მადლობა, რადგან ეს ყველას გამარჯვებაა!", — აღნიშნავს ზურაბიშვილი.

პრეზიდენტმა მადლობა გადაუხადა სამართალდამცავებს და საერთაშორისო სადამკვირვებლო მისიების წარმომადგენლებს, ასევე, ცესკოს. მისი თქმით, "ჩვენ შევძელით" არჩევნების ახალი საარჩევო სისტემის მიხედვით ჩატარება და ეს დემოკრატიისკენ გადადგმული კიდევ ერთი ნაბიჯია.

"ჩვენ შევძელით, პანდემიის მიუხედავად, ჩაგვეტარებინა უსაფრთხო არჩევნები. ამისი მაგალითი იყო მთელს ქვეყანაში, საარჩევნო უბნებთან მოქალაქეების მოწესრიგებული რიგები, პანდემიამ ვერ შეაშინა ამომრჩეველი, ყველგან იგრძნობოდა სიფრთხილე და სამოქალაქო პასუხისმგებლობის მაღალი ხარისხი", — აღნიშნავს ის.

ზურაბიშვილი განცხადებაში ეხება აზერბაიჯანისა და სომხეთის კონფლიქტსაც. პრეზიდენტი აღნიშნავს, რომ "ჩვენ შევძელით", რეგიონში მიმდინარე კონფლიქტის მიუხედავად, არჩევნები მშვიდობიან გარემოში ჩაგვეტარებინა.

"მშვიდობიანად დამთავრდა საარჩევნო პროცესი იმ რეგიონებში, სადაც კომპაქტურად ცხოვრობენ სომეხი და აზერბაიჯანული წარმოშობის ჩვენი მოქალაქეები. ეს იმის ნიშანია, რომ ამ ურთულესი და მტკივნეულ კონფლიქტის პირობებში, საქართველო კვლავ არის სტაბილურობის კუნძული და ქვეყანა სადაც კავკასიური თანაცხოვრებისა და ტოლერანტობის ტრადიციები გრძელდება. ვიმედოვნებ, რომ ჩვენ შევძლებთ პოზიტიური როლის შესრულებას იმისათვის, რომ ჩვენს რეგიონში აღდგეს მშვიდობა, რაც სამივე ქვეყნის მომავლისთვის აუცილებელი პირობაა", — აღნიშნულია განცხადებაში.

საქართველოში საპარლამენტო არჩევნები 31 ოქტომბერს გაიმართა. ხმების ძირითადი ნაწილი უკვე დათვლილია და შედეგების მიხედვით, პირველ ადგილზე ქართული ოცნებაა, მეორეზე კი, ნაციონალური მოძრაობა. ამ დროისთვის, მმართველ პარტიას 50%-ზე ნაკლები მხარდაჭერა აქვს.