ზუგდიდის მე-5 საარჩევნო უბანზე ევროპული საქართველოს წარმომადგენელს უბნიდან გაძევებით დაემუქრნენ, რასაც დაპირსპირება მოყვა.

ევროპული საქართველოს წევრი, ბესიკ დონაძე ამბობს, რომ მათ წარმომადგენლის უბნიდან გაძევება იმიტომ მოინდომეს, რომ მან უბნიდან უკან გააბრუნა რამდენიმე ადამიანი, რომლებსაც ერთხელ უკვე ჰქონდათ ხმა მიცემული.

"ევროპული საქართველოს წარმომადგენელმა უბნიდან დაახლოებით შვიდი ადამიანი გააბრუნა უკან, ორი საათის განმავლობაში. გადაუმოწმა პირადობები და გააბრუნა უკან. შემდეგ, ქართული ოცნების წარმომადგენლები და არასამთავრობო ორგანიზაციები, რომლებიც მათთან არიან აფილირებულები გაღიზიანდნენ და მოინდომეს ამ ადამინის გაძევება იმ მოტივით, რომ, თურმე, რეგისტრატორები წუხდებიან", — განაცხადა ბესიკ დონაძემ.

ასევე, ამავე უბნიდან გააძევეს ნაციონალური მოძრაობის დამკვირვებელი, რომელიც ვიდეოკადრებს იღებდა. ამის შესახებ გაერთიანებული ოპოციის შტაბის ხელმძღვანელი, თეიმურაზ ბასილაია ამბობს.

"ამავე ტერიოტირაზე არის ორი უბანი და რატომღაც ისე დაემთხვა, რომ ორივე მათგანიდან ერთდროულად გააძევეს ჩვენი წევრები. ეძებენ, რაიმე მიზეზები ნახონ რომ გააძევონ ჩვენი წარმომადგენლები", — განაცხადა თეიმურაზ ბასილაიამ