ერთიანი ნაციონალური მოძრაობის ერთ-ერთმა ლიდერმა, ნიკა მელიამ განაცხადა, რომ ბუბა კიკაბიძის რუსულად შესრულებული "თბილისო" დაგეგმილი არ იყო და შეეშალათ.

"სცენასთან ვიდექი, მეც გამიკვირდა. ადამიანმა გულახდილად თქვა, შემეშალაო. ბუბა კიკაბიძეს ათიათასჯერ უმღერია ეს სიმღერა, ბევრჯერ გაუხარებია ბევრი აპოლიტიკური ადამიანი. ჩვენთვისაც მოულოდნელი იყო, თმები ყალყზე დამიდგა", — განაცხადა ნიკა მელიამ.

ბლოკის ერთიანი ნაციონალური მოძრაობა-გაერთიანებული ოპოზიცია-ძალა ერთობაშიას სიის პირველმა ნომერმა, ბუბა კიკაბიძემ პარტიის ღონისძიებაზე სიტყვით გამოსვლისას სიმღერა "თბილისო" ქართულ-რუსულად შეასრულა.

კიკაბიძემ მეორე სიმღერაც შეასრულა თბილისის უბნებზე.

ერთიანი ნაციონალურ მოძრაობის წინასაარჩევნო დასკვნითი ღონისძიება თავისუფლების მოედანზე გაიმართა.

მოგვიანებით, ბუბა კიკაბიძემ განმარტა, რატომ შეასრულა ქართული სიმღერა რუსულად.

"ბუბამ რატომ იმღერა ორი კუპლეტი რუსულად "თბილისოო". მე ვუთხარი, იმიტომ, რომ გაეგოთ, როგორი ლამაზი ქვეყანა ვართ ჩვენ", — ასე განმარტა ენმ-ის სიის პირველმა ნომერმა, ბუბა კიკაბიძემ სიმღერა "თბილისოს" რუსულად შესრულების მიზეზი.