ქართული ოცნების ერთ-ერთმა ლიდერმა, მამუკა მდინარაძემ ჟურნალისტებს მიმართა გადაეცათ ნატო გოგელიასთვის მოეკითხა თუ ვინ იყო ირგვლივ, როდესაც ბესო ქათამაძეს ესაუბრებოდა. ეს მდინარაძემ ნატო გოგელიას მიერ გაკეთებულ განცხადებასთან დაკავშირებით თქვა.

"ასეთ რაღაცას სანამ დაგვაბრალებთ, ნატო გოგელიას გადაეცით და კითხეთ, ასევე, მოიკითხოს ვინ უსმენდა, იქვე ვინ იყო, როდესაც ელაპარაკებოდა ან ერთი ან მეორე მხარე ერთმანეთს, ვინ იყვნე ირგვლივ, ვის ესმოდა ეს საუბარი და ვის შეეძლო გამოეტანა ინფორმაცია ან მიხვდებიან და ან არა, მაგრამ ეს ძალიან არ მადარდებს", — განაცხადა მდინარაძემ.

ქართული ოცნების ერთ-ერთი ლიდერის მტკიცებით, ნაციონალური მოძრაობის წარმომადგენლებისგან ინფორმაციას იღებენ იმასთან დაკავშირებით, თუ რას გეგმავენ და არჩევნების დროს რის გავრცელებას აპირებენ ნაციონალური მოძრაობიდან.

"ყოველდღიურად მოდის ათობით ინფორმაცია შეწუხებული, რაც არ უნდა გასაკვირი იყოს, ეს ადრე არ ხდებოდა, ნაციონალური მოძრაობის წარმომადგენლებისგან იმასთან დაკავშირებით, რომ ასეთ რამე სგეგმავენ, არჩევნების დროს ამის გავრცელებას აპირებენ, იმ ინფორმაციის გავრცელებას აპირებენ და ნაკრები წარმოგიდგინათ დღეს ირაკლი კობახიძემ", — განაცხადა მდინარაძემ.

ნატო გოგელიამ მამუკა მდინარაძის განცხადებას TV პირველის ეთერში უპასუხა და თქვა, რომ ქათამაძესთან საუბრის დროს სახლში იმყოფებოდა.

"ძალიან თამამად ვეტყვი მამუკა მდინარაძეს, რომ ზუსტად იმ დროს, როდესაც ბესო ქათამაძეს თვითონ დავურეკე, ვიყავი საკუთარ სახლში, ბათუმში, ვიყავი საწოლში და ვიყავი სრულიად მარტო. თუ უფრო მეტი აინტერესებს ირაკლი კობახიძეს, ძალიან თამამადაც ამოვიღებ მე ვიდეოკადრებს, სადაც გადავაადგილდებოდი, შემდეგ როგორ ჩამოვედი გურიაში და ზუსტად ვიცი, რომ ბესო ქათამაძეც სახლში იმყოფებოდა იმიტომ, რომ გავაღვიძე და საყვედურიც მივიღე ამის გამო", — განაცხადა გოგელიამ.

ირაკლი კობახიძემ დღეს გამართულ სპეციალურ ბრიფინგზე კიდევ ერთხელ განაცხადა, რომ ოპოზიცია არჩევნების დღეს დესტრუქციებს გეგმავს. ამის შემდეგ კი ისაუბრა TV პირველის ჟურნალისტ ნატო გოგელიასა და ოზურგეთში ნაციონალური მოძრაობის შტაბის თავმჯდომარის, ბესო ქათამაძის დიალოგზე. ქართული ოცნების ერთ-ერთი ლიდერის მტკიცებით, ჟურნალისტი ქათამაძეს ეკითხებოდა, სად სჭირდებოდა მხარდაჭერა "არეულობის პროცესში".

მას არ დაუკონკრეტებია, საიდან იცის ამ საუბრის შესახებ, მხოლოდ ის თქვა, რომ დიალოგი ისეთ ადგილას იყო, სადაც ნაციონალური მოძრაობის სხვა წარმომადგენლებიც იმყოფებოდნენ. TV პირველის ჟურნალისტის განცხადებით კი, საუბარი ტელეფონით შედგა და დადასტურდა, რომ მას უსმენენ.