მმართველი გუნდის ერთ-ერთი ლიდერი, მამუკა მდინარაძე პირობას დებს, რომ არჩევნების შედეგების შემდეგ ნაციონალური მოძრაობა, რომელიც "ისედაც დაშლის პირასაა", საბოლოოდ, დაიშლება და პოლიტიკურ ასპარეზზე ახალ ძალებს გაეხსნებათ გზა. ამის შესახებ მან სპეციალურ ბრიფინგზე ისაუბრა.

"საოგადოებამ და თქვენც, ძალიან კარგად იცით, რომ ძალიან მაღალია ალბათობა იმისა, რომ ქართულმა ოცნებამ, დაახლოებით, 60 პროცენტიანი რეიტინგი დაიჭიროს ამ არჩევნებზე, ამისათვის საჭიროა ყველა მოქალაქე მივიდეს არჩევნებზე. ამ შემთხვევაში, ეს პროცენტი იქნება გაცილებით მაღალი, ვიდრე ვინმეს წარმოუდგენია. ამ შემთხვევაში, გაცილებით დაბალი იქნება, სამწუხაროდ, მთავარი ოპოზიციური, მავნებელი პარტიის საარჩევნო შედეგი და გაძლევთ პირობას, რომ ნაცმოძრაობა, რომელიც ისედაც დაშლის პირასაა და ისინი წკიპზე არიან, ელოდებიან არჩევნებს — საბოლოოდ დაიშლება და მართლაც, ახალ და ჯანსაღ ძალებს გაეხსნებათ გზა პოლიტიკურ ასპარეზზე. ოპონირება იქნება უფრო საქმიანი და საზოგადოებრივი ინტერესებიდან გამომდინარე", — განაცხადა მდინარაძემ.

2020 წლის 31 ოქტომბერს საქართველოში საპარლამენტო არჩევნები გაიმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ჩატარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.