მმართველი გუნდის ერთ-ერთი ლიდერის, მამუკა მდინარაძის განცხადებით, ნაციონალური მოძრაობა არჩევნების დღეს მრავალათასიან აქციას აანონსებს და 12 საათის შემდეგ პარლამენტის წინ შეკრებას გეგმავს. მდინარაძის თქმით, მათი ეს "მავნებლური" ქმედება კიდევ ერთხელ აჩვენებს, რომ პარტია არჩევნების ნაცვლად, არეულობისთვის ემზადება.

"როგორც ჩანს, სრული რესუსრის მობილიზაციას ამ მიმართულებით, არასაარჩევნოდ აპირებენ და აანონსებენ მრავალათასიანი აქციის ჩატარებას, ხაზს ვუსვამ, არჩევნების დღეს 12 საათიდან. ეს ნიშნავს, რომ ნაციონალურ მოძრაობა არის სასოწარკვეთილების პიკში, მათ ზუსტად იციან, რომ დემოკრატიულ არჩევნებში რაიმე სახის წარმატების შანსი არ გააჩნიათ, შესაბამისად, როცა მთელი მოსახლეობა ხმის მიცემის საარჩევნო პროცესში იქნება ჩართული, როგორც ჩანს, ხმების პარალელური დათვლის შედეგად მიღებული მონაცემების დაცვის აბსურუდული საბაბით, ნაცმოძრაობა ფსონს სიტუაციიის რადიკალიზაციაზე, არეულობის შექმნაზე აკეთებს და სრული რესურსით ქვეყნის მთავარ გამზირზე იკრიბება. ფაქტია, რომ ამ პარტიას არჩევნების მობილიზების ნაცვლად, სხვა სახის, დესტრუქციული მიზნები აქვს და მნიშვენლოვანია, საზოგადოებამ მათ მორიგ მავნებულურ ზრახვებს, ამ უკიდურესად პროვოკაციულ ქმედებას, კიდევ ერთხელ გასცეს ღირსეული პასუხი", — აცხადებს მდინარაძე.

On.ge-ში თბილისის მერიაში დაუდასტურეს, რომ ნაციონალურ მოძრაობამ 29-სა და 31 ოქტომბერს აქციების გამართვასთან დაკავშირებით მათთან განაცხადი შეიტანა.

On.ge დაუკავშირდა ნაციონალურ მოძრაობას. პარტიის პასუხს მიღებისთანავე შემოგთავაზებთ.

2020 წლის 31 ოქტომბერს საქართველოში საპარლამენტო არჩევნები გაიმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ჩატარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.