ევროპული საქართველოს რუსთავისა და გარდაბნის მაჟორიტარობის კანდიდატის, ირმა ნადირაშვილის თქმით, მხოლოდ 3 დღე დარჩა გამოცხადებული დამარცხების ქრონიკის ოფიციალურად გასაფორმებლად.

"ჩემი რწმენა დღეს არის ძალიან მყარი. მე დარწმუნებული ვარ, რომ 3 დღეში ივანიშვილის არაფორმალურ მმართველობას გავატანთ წყალს. ჩვენ დაგვრჩა ერთი რამ, რომ წინასწარ გამოცხადებული დამარცხების ქრონიკა 3 დღეში ოფიციალურად გავაფორმოთ. ეს არის ჩვენი ვალი და ამას ჩვენ ყველა ერთად გავაკეთებთ. ჩვენ საქართველოში უნდა დავასრულოთ ის ვითარება, როდესაც ადამიანების უბედურების ხარჯზე კეთდება ფული და მე შეგახსენებთ, რომ პანდემიაც კი ოცნებამ გამოიყენა იმისთვის, რომ ჯიბეები გაესქელებინათ და საკუთარი პოლიტიკური მიზნებისთვის ესაუბრათ", — განაცხადა ნადირაშვილმა.

ნადირაშვილმა აღნიშნა, რომ სწორედ მრავალპარტიული, კოალიციური მთავრობა მოუტანს ქვეყანას გარდამტეხ ცვლილებებს.

"ჩვენ გვჭირდება მრავალპარტიული პარლამენტი, კოალიციურ მთავრობა და ვიბრძვით ამისთვის. უნდა დასრულდეს საქართველოში ვითარება, როდესაც ერთი კაცის ჩექმის ქვეშ ხდება ყველაფერი, როდესაც ყველა ორგანო არის პოლიტიკური იარაღი. მჯერა, რომ ქართველი ხალხი მხარს დაუჭერს განვითარებას და ევროპულ საქართველოს, და 3 დღეში ერთად აუცილებლად დავამარცხებთ ბიძინა ივანიშვილს", — განაცხადა ნადირაშვილმა.

ევროპულმა საქართველომ დღეს, თბილისში, რესპუბლიკის მოედანზე მოსახლეობასთან შემაჯამებელი შეხვედრა გამართა.