"სისხლმოწყურებულები, ელოდებიან იქნებ რამე მოხდეს, იქნებ დამნაშავემ კიდევ აიყვანოს ვინმე მძევლად", — ამბობს, პარლამენტის პირველი ვიცე-სპიკერი გიორგი ვოლსკი. მისი თქმით, ოპონენტი პოლიტიკოსები ცდილობენ ზუგდიდში საქართველოს ბანკზე თავდასხმა უფრო გაამძაფრონ.

"არ ვიცი, თუ შეიძლება, რომ ტელევიზია ეწოდოს, ისინი ორიენტირებულები არიან იმისათვის, რომ რაც შეიძლება მეტი დაძაბულობა მოჰყვეს იმასაც, რასაც ჰქვია მეორე ნაწილი. პოლიციამ, პირველი ნაწილი შესანიშნავად ჩაატარა, მაღალპროფესიონალურ დონეზე. შეხედეთ პოლიტიკოსებს ვინ რას ამბობს, ვინ როგორ აფასებს ამ სიტუაციას და ვის რა მიზანი აქვს", — განაცხადა გია ვოლსკიმ.

26 ოქტომბერს, შინაგან საქმეთა სამინისტრომ დაადასტურა, რომ ზუგდიდში საქართველოს ბანკში შეჭრილი პირი ბადრი ესებუაა. 26 ოქტომბერს ღამით, ბადრი ესებუას საცხოვრებელ სახლში ჩატარდა სპეცოპერაციაც. დამნაშავეს ამ დრომდე ეძებენ.

21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლების გარდა თავდამსხმელმა წაიყვანა სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. შეიარაღებულ პირთან მოლაპარაკებებს ის აწარმოებდა.

გაიგე მეტი: